Populyar prodüser Təranə Səmədovanın adı bu dəfə kriminal xronikada hallanmağa başlayıb.Prodüser küçə davasında iştirak edib. Məlumatlı mənbənin Day.Az saytına bildirdiyinə görə, dava zamanı ona qarşı soyuq silahdan istifadə olunub. Təranəni bıçaqlamış qadın artıq həbs edilib.Nəsimi Rayon Polis İdarəsindən məlumatı təsdiqləyiblər. Baş təhqiqatçı Müşfiq Qubadov bildirib ki, baş verənlərlə bağlı hələ fevralın 8-də Qəribova Anjela Şəmsəddin qızı axtarışa verilibmiş və o, artıq həbs olunub: «Təranə Səmədovaya hücum etmiş digər qadın - Muradova Şahnabat Bəxtiyar qızından isə ölkəni tərk etməmək haqda iltizam alınıb. Vətəndaş Səmədovanın özünə gəlincə, o, hələ ki, cinayət məsuliyyətinə cəlb olunmayıb. Amma bu da mümkündür. Çünki insident zamanı adıçəkilən qadınlar da xəsarət alıblar və bu iş üzrə istintaq davam edir. İnsident zamanı Kərimov Nazim Namizəd oğlu və Nəsibova Lalə İslam qızı da həbs olunublar».Məsələyə T.Səmədovanın münasibəti isə qısa olub: «Qoy indi hamı bilsin ki, mənə qarşı törədilmiş istənilən cinayətə görə cəza olacaq».
