-Demək olar ki, planetin bir-birinə əks nöqtələrində oxuyub, işləmisiniz. Qarşıya qoyduğunuz məqsəd nədir?
-Peşəkar iqtisadçı olmaq istəyirəm. Adətən gənclər magistr dərəcəsi aldıqdan sonra karyera qurmağa can atırlar. Mən isə doktorantura haqda fikirləşirdim. Amma düşünürdüm ki, təhsil müddətində işləmək də pis olmazdı. Bu istəklərimin hamısını reallaşdıra bildim. İqtisadiyyatı öyrənmək baxımından Avstraliya cəlbedici görünürdü. Çünki Avropa ölkələri hələ iqtisadi böhrandan canını qurtara bilmədiyi halda, Avstraliya iqtisadiyyatı son bir neçə ildə sürətlə inkişaf etməkdədir. Beləliklə, ötən il Melburna getdim.
Burada keçmiş maliyyə böhranlarının ortaq cəhətləri, onlardan qaçılmasının yolları, dövlətlərin və beynəlxalq maliyyə təşkilatlarının belə situasiyalarda atacağı addımlar və s. kimi suallara cavab axtardığım elmi tədqiqatla məşğulam.
-Amma uğurlu təhsillə yanaşı, həm də Avstraliyada dövlət işində çalışırsınız. Bu sahədə təcrübəniz elmi işinizdə necə kömək edir?
-Çox faydalıdır. Artıq 1 ildir ki, Viktoriya ştatının Maliyyə və Vergi Departamentinin İqtisadi və Gəlir Proqnozlaşdırması şöbəsində çalışıram. Burada işə düzəlməyim də çətin başa gəldi. 97 nəfər arasında seçilən 3 nəfərdən biri olmuşdum. Hazırda vergi gəlirlərinin proqnozlaşdırılması, bu sahədə araşdırmaların aparılmasında iştirak edirəm. Qatıldığım ən böyük layihə Viktoriya ştatında əhalinin yaşlanmasının gəlirlərə necə təsir etməsi ilə bağlı hesabatın hazırlanmasıdır.
Onu da deyim ki, bu il dekabrın sonunda Azərbaycan Diplomatik Akademiyanın təşkil etdiyi seminara dəvət almışam. ADA artıq 8-ci dəfədir ki, xaricdə təhsil alan azərbaycanlı PhD tələbələrini bir araya toplayaraq onlara öz işlərini təqdim etmək imkanı yaradır. Ümumiyyətlə, bir müddətsonra Vətənə qayıdıb bilik və iş təcrübəmi milli iqtisadiyyatımızın inkişafına sərf etməyi düşünürəm.
-Avstraliyada Azərbaycanı necə tanıdırsınız?
-Əvvəlcə onu deyim ki, burada əhalinin demək olar hər 3 nəfərindən 1-i immiqrantdır. Məhz bunun nəticəsində ölkədə çox müxtəlif mədəniyyətlərin nümayəndələri ilə rastlaşmaq olar.
Avstraliyada Azərbaycan səfirliyi cəmi bir neçə ay bundan əvvəl fəaliyyətə başlayıb. Səfirlik əməkdaşları mənimlə və burada yaşayan bir neçə soydaşımızla əlaqə saxlayanda çox sevindim. Bildirdilər ki, hər hansı problem, arzu və istəklərimiz olacağı təqdirdə, onlara müraciət edə bilərik. Ölkəmizdən on minlərlə km aralıda belə doğma münasibət görmək çox xoş idi. Harada olsaq da, Azərbaycan dövlətini öz arxamızda hiss edirik. Bu, sözlə ifadə edilməyəcək qədər gözəl stimuldur.
Həm iş yerində, həm də universitetdə özümü Azərbaycan dövlətinin mənə bəslədiyi etimada layiq aparmağa, Vətənimiz haqda xaricilərə bol məlumat verməyə çalışıram.
