Həyatın dərinliklərində, görünməyən qatlarda bir həqiqət gizlənir - böyüklük təkcə səslə, alqışla, titullarla ölçülmür. Əsl böyüklük, bəzən kənarda qalan, zəif görünən, amma ürəkdən gələn sadə bir jestdə, sükutla verilən dəstəkdə gizlənir. İnsanlar böyük səhnələrdə parlayarkən, həqiqi böyüklər isə gözlərdən uzaqda, bəzən kiminsə əlindən tutub ona inandığını hiss etdirdikdə meydana çıxır.
Bir insanı əsl böyüklüyə aparan yol - yalnız sözlərin və ya uğurların siyahısı deyil, toxunduğu ruhların, açdığı qapıların, yandırdığı işıqların hesabatıdır. Və bu işıqlardan ən parlaq olanı, gənclərin həyatına düşən işıqdır - onları qarışıqlıqdan çıxarıb ümidə, inama və özlərinə inam hissinə aparan o işıq. Çünki illər sonra sənə verilən titulları, tutduğun vəzifələri xatırlamaya bilərlər. Amma bir gəncin "O, mənə inandı və dəstək oldu” deyə xatırladığı insan olmaq - bu, ömür boyu silinməyən, ruhda dərin iz buraxan ən əziz mirasdır. Çox vaxt biz uğuru səslə, təriflə, prestijlə ölçürük. Amma ən dəyərli böyüklük - səmimi, səssiz, gizli qalan, bir gəncin əlindən tutan, ona inanan insanın böyüklüyüdür. Bu böyüklük, dünyanın ən qürurverici titullarından belə daha dəyərlidir.
Uşaq yaşlarımdan yazmaq mənim üçün sadəcə bir məşğuliyyət deyil, nəfəs almaq kimidir. Sevincimi, kədərimi və bütün hisslərimi sözlərə, cümlələrə tökməyə çalışmışam və indi söz mənim həyatımın təməlidir. Hər hekayəmdə, məqaləmdə özümdən bir parça, hər şeirimdə ruhumun izləri gizlidir. İllərlə yazdım, müsabiqələrdə iştirak etdim – dəfələrlə qalib gəldim. Amma səsimi məhdud çərçivədə çatdıra bilirdim. Çəkdiyim əziyyətlərin, sərf etdiyim zəhmətin qarşılığını almaq isə ən gözəl hissdir. Buna görə ömrüm boyu dəyərli Rəşad Məcidə minnətdaram. Həqiqi uğur yalnız mükafatlarda deyil, toxunduğun insanların qəlbində qalan izdədir.
Rəşad Məcid ədəbiyyatın və mətbuatın ön sıralarında təsadüfən deyil, məsuliyyətlə dayanır. Onun sözü, mövqeyi, insanlara yanaşması - hamısı bir yolun, bir əqidənin nəticəsidir. Rəşad Məcid sözün, inamın, dəstəyin gücünü çox yaxşı bilir.
Seçilmiş insanlar var ki, onların bir baxışı, bir sözü, bir dəstəyi insanın həyatında dönüş nöqtəsi olur, Rəşad Məcid məhz, o insanlardandır. Onlar bilirlər ki, bir gəncə verilən kiçik dəstək illər sonra böyük bir işığa çevrilə bilər. Bu işıq, təkcə o gəncin deyil, gələcək nəsillərin də yolunu işıqlandırır.
21 avqust - Rəşad Məcidin doğum günüdür. Bu gün onun illərlə topladığı uğurların, yaratdığı əsərlərin, yetişdirdiyi gənclərin tarixə düşdüyü gündür. Amma hər doğum günü həm də səssiz bir hesabatdır: kimlərin yoluna işıq saldım, kimlərin səsinə biganə qaldım? Həyatımızda bu sualın cavabı çox vaxt vicdanımızın səssiz sədasında gizlidir.
Bəzən insan həyatında ən böyük dəyişiklik onun haqqına düşən dəyəri vaxtında görməsidir. O dəyər verilməyəndə, o an itəndə geridə yalnız "kaş ki”lər qalır.Vicdan isə heç vaxt bu "kaş ki”ləri unutmur.
Həyat sürətlə axır, məsuliyyətlər çoxdur. Hər kəs yaza bilər, amma hər kəs ruhlarda iz buraxa bilməz. Siz yalnız ədəbiyyatın dəyərli bir xidmətçisi deyilsiniz, həm də mənim kimi gənclərin həyatında unudulmaz səhifə yazan böyük insansınız.
Doğum gününüz mübarək, əziz Rəşad Məcid. Bu gün təkcə sizin deyil, toxunduğunuz bütün həyatların bayramıdır. Qələminiz təkcə söz yaratmır, ruhlara toxunur. Siz bizə öyrədirsiniz ki, insanın ən böyük zənginliyi yaratdığı dəyər, qəlblərdə qoyduğu izdir. Bu gün sizi təbrik edərkən biz təkcə bir yazarı deyil, milli yaddaşımızın canlı parçasını, mənəvi dayağımızı, ədəbiyyatımızın nəfəsini təbrik edirik. Sözünüz daim işıq saçsın, Rəşad Məcid!
Məryəm Bağırova
