Rusiyanın paytaxtı Moskvada bu gün 5 mitinq planlaşdırılıb. Mitinqlərdə 200 minədək insanın iştirak edəcəyi gözlənilir. Kommunist, Liberal-demokratik, "Ədalətli Rusiya" partiyaları, həmçinin ÜmumRusiya Xalq Cəbhəsinin nümayəndələri və baş nazir Vladimir Putinin seçkiqabağı qərargahının rəhbərinin başçılığı ilə vətəndaş qrupu bu gün Moskvada aksiyalar keçirir. Birinci aksiyaya Vladimir Putinin tərəfdarları çıxıb. Təşkilatçıların məlumatına görə, məqsəd hakim siyasi kursa təqdiri ifadə etmək və ölkəni dağıtmaq istəyən qüvvələrə etiraz nümayiş etdirməkdir. Bu aksiyaya 30 minədək insanın qatılacağı gözlənilir. Daha sonra isə müxalifət liderlərinin də iştirakı ilə mitinqlərin başlayacağı bildirilir. Bu gün Rusiyanın bir çox regionlarında da prezidentliyə namizədlərə dəstək aksiyaları planlaşdırılıb. Uzaq Şərq regionunun sakinləri artıq mitinqlərdə iştirak ediblər. Vladivostokda kommunistlər mərkəzi meydana toplaşıb. Paytaxt Moskvada mitinqlərdə təhlükəsizliyi 10 minədək polis əməkdaşı və daxili qoşunların hərbçiləri təmin edəcək.
