Xəbər verdiyimiz kimi, Xalq artisti Miri Yusifin prodüseri Emin Əfəndi Rusiyaya buraxılmayıb.
Emin Əfəndinin Rusiya ərazisinə buraxılmamasına səbəb kimi onun "telegram" kanalında Rusiya ilə bağlı yazdığı statusların səbəb olduğu bildirilib.
Baş verən neqativ hal ilə bağlı AZXEBER.COM-a açıqlama verən Emin Əfəndi ona heç bir rəsmi izahın verilmədiyini bildirib:
"Rusiya ərazisində buraxılmadığım vaxt ərzində mənə rəsmi izah verən olmadı. Tək sözləri "sən gözlə” oldu, pasportumu aldılar. Pasportdan da vacib olan telefonumu da əlimdən aldılar".
Emin Əfəndi Ukraynanın ərazi bütövlüyünü dəstəklədiyini dediyinə görə saxlanıldığınl iddia edib:
"Əvvəl məni Ukraynanın ərazi bütövlüyünü dəstəkləməkdə günahlandırırdılar. Ola bilər, bu onların vətəndaşları üçün ağır və bağışlanmazdır, amma mən Azərbaycan vətəndaşıyam. Yaxşı anlayıram ki, qəzəb Ukraynaya münasibətimdən çox, gündən-günə güclənən dövlətimədir. Əgər söhbət ərazi bütövlüyündən gedirsə, ölkəmin başçısı daha ilk gündən Ukraynanın sərhədlərini tanıdı və dəstəklədi, mən də vətəndaş olaraq bu siyasətlə razıyam. Sən milyon dəfə "xüsusi hərbi əməliyyat” desən də, hamı bilir ki, bu müharibədir, öldürülən əsgərlər, dağılan evlər, günahsız uşaqlar, qadınlar, bunlar müharibənin acı həqiqətləridir. Mən də bütün normal insanlar kimi qan tökülməsinə qarşıyam, bunu dünya başa düşürəm, amma sən anlamadın, ya da anlamaq istəmədin, sən artıq Orwellin qələmi ilə yazılmış canlı bir kitaba çevrilmisən".
Rusiyada azərbaycanlılara qarşı münasibətdən danışan Emin Əfəndi deyib:
"Moskvaya uçan təyyarədə bütün azərbaycanlıların pasportlarını yığdılar, hamını ən azı iki saat gözlətdilər, bəzilərini, mənim kimi, ümumiyyətlə buraxmadılar, bu, artıq ayrı-ayrı insanların münasibəti deyil, bu, dövlət səviyyəsində qurulmuş bir sistemdir və hər gün daha da sərtləşir”.
Emin Əfəndi saxlanılma şəraitindən də danışıb:
"Bir sutka ərzində mən müxtəlif, əsasən də müsəlman ölkələrindən gələn insanlarla bir yerdə oldum, onlarla söhbət edərkən anladım ki, ölkəmizə münasibət dəyişib, o insanlar bizə xüsusi hörmətlə yanaşır, başa düşür, həmrəylik göstərirdilər, biz bunu müstəqil siyasətimiz və ədalət savaşımızla qazanmışıq. Sorğu-sual aparan rütbəlilər isə sadəcə dindirən deyildilər, onlar sanki Solovyovun dili ilə mənimlə mübahisə edir, özlərini haqlı göstərməyə çalışırdılar, həmin anda bir daha dərk etdim ki, bizim ölkə böyüyür, güclənir, inkişaf edir və bu inkişaf çoxuna sərf etmir".
Günel Hüseynli
