Saatlı rayonunun Kamallı kəndində təbii qaz problemi illərdir həllini gözləyir.
AZXEBER.COM-un Xezerxeber.az-a istinadən məlumatına görə, kənd sakinləri gündəlik məişət ehtiyaclarını odunla qarşılamağa çalışırlar.
Çay, yemək bişirmək, evin qızdırılması - bütün bunlar qazın olmadığı şəraitdə əlavə xərc və zəhmət yaradır.
Sakinlərin sözlərinə görə, odun əldə etmək də asan deyil. Yaxınlıqdakı meşəlik ərazilərdən ağac kəsməyə icazə verilmir. Hazır odun almaq isə hər ailənin büdcəsinə uyğun deyil.
Qazın olmaması xüsusilə yaşlı və xəstə sakinlərin gündəlik həyatını daha da çətinləşdirir. Onlar odunla ev təsərrüfatını idarə etməyin fiziki baxımdan da ağır olduğunu deyirlər. Sakinlərin əsas narazılığı isə odunun əldə edilməsinin çətinliyi ilə bağlıdır. Bir ailənin soyuq aylarda təkcə yanacaq üçün ən azı 5 maşın oduna ehtiyacı olur. Bir maşın odunun qiyməti isə 250-300 manatadır.
Sakinlərin sözlərinə görə, mövcud problemlə bağlı aidiyyəti qurumlara dəfələrlə həm şifahi, həm də rəsmi şəkildə müraciət ediblər, lakin indiyədək nəticə dəyişməyib.
Məsələ ilə bağlı "Azəriqaz” İstehsalat Birliyindən bildirildi ki, sözügedən kəndin qazlaşdırılması məsələsinə mailyyə imkanlarından asılı olaraq növbəti mərhələlərdə baxıla bilər.
