Bu gün Bakı Dövlət Universitetində Sinxua foto qalereyasının açılışı olub
BDU-nun Mətbuat və İnformasiya şöbəsindən AZXEBER.COM-a verilən məlumata görə, Azərbaycan və çin xalqları arasındakı mədəni əlaqələri daha da inkişaf etdirmək məqsədilə təşkil edilən sərgini Bakı Dövlət Universitetinin rektoru, akademik Abel Məhərrəmov və Sinxua Xəbərlərlər Agentliyinin Asiya-Avropa Bürosunun redaksiya mərkəzinin rəhbəri xanım San Xua açıblar.
Qonaqları və tədbir iştirakçılarını salamlayan rektor, akademik Abel Məhərrəmov bu cür sərginin BDU-da açılmasını yalnız universitetin deyil, hər iki xalqın həyatında əlamətdar hadisə hesab edib.
Azərbaycan və çin xalqlarının yaxınlığından danışan rektor, onların oxşar yüksək mədəniyyətə, böyük tarixi köklərə malik olduqlarını qeyd edib. Akademik Abel Məhərrəmov bildirib ki, tarixlər boyunca xalqlarımız arasında olan əlaqələrin daha da inkişafında ən böyük uğur ümummilli lider Heydər Əliyev və çin xalqının göstərdiyi birgə səyləri nəticəsində əldə edilmişdir. Həmin siyasət bu gün respublika prezidenti İlham Əliyev tərəfindən də uğurla davam etdirilir.
Tədbirdə Sinxua Xəbərlərlər Agentliyinin Asiya-Avropa Bürosunun redaksiya mərkəzinin rəhbəri xanım San Xua çıxış edərək Azərbaycan-Çin əlaqələrindən danışıb, sərginin təşkilinin əhəmiyyətini qeyd edib. Bildirib ki, qalereya Azərbaycan və Çin mədəni əlaqələrinin daha da intensivləşməsinə xüsusi töhfə verəcək.
Daha sonra “Azərtac”ın Baş Direktoru Aslan Aslanov çıxış edərək bu tədbirin ölkələrarası informasiya mübadiləsinin də güclənməsində böyük rolu olacağını bildirib.
Açılış mərasimində ÇXR-in Azərbaycandakı Fövqəladə və Səlahiyyətli səfiri cənab Hong Jiuyin, ÇXR-in Azərbaycandakı səfirliyinin hərbi attaşesi cənab Liu Hun, ÇXR-in Azərbaycandakı səfirliyinin I katibi xanım Li Yunxuy, Sinxua Xəbərlərlər Agentliyinin Asiya-Avropa Bürosunun redaksiya mərkəzinin rəhbəri cənab San Xua, Sinxua Xəbərlərlər Agentliyinin Asiya-Avropa Bürosunun redaksiya mərkəzinin marketinq üzrə meneceri cənab Van Tsıbo və Sixua Xəbərlər Agentliyinin Asiya-Avropa Bürosunun Azərbaycan Respublikasındakı nümayəndəsi Liu Yan iştirak ediblər.
Qeyd edək ki, sərgi BDU nəzdindı fəaliyyət göstərən Konfutsi institutu, Sinxua Xəbərlər Agentliyi və Çinin Anxoy universitetinin təşkilatçılığı ilə keçirilib.
