Azərbaycanın “Eurovision 2012” təmsilçisi Səbinə Babayeva tanıtım turu üçün yola düşüb. AZEXBER.COM-un müsabiqənin rəsmi saytına istinadla verdiyi məlumata görə, təmsilçimiz ilk olaraq Macarıstan, daha sonra Niderland və Böyük Britaniyaya səfər edəcək.Səbinə Babayeva aprelin 6-7-də Budapeştdə tələbə forumunda iştirak edəcək və pərəstişkarları tərəfindən təşkil edilmiş bir neçə tədbirə qatılacaq. Təmsilçimiz Macarıstan təmsilçisi "Compact Disco" qrupunun üzvləri ilə də görüşəcək. Eləcə də bir neçə televiziya şousunda iştirak edəcək.Aprelin 21-də isə Niderlandda Eurovision Mahnı Müsabiqəsindən əvvəl ən böyük promo hadisə - "Eurovision in Concert"in dördüncü konserti olacaq. Səbinə Babayeva bu konsertdə çıxış edəcək.Daha sonra təmsilçimiz aprelin 29-da Londonda Eurovision əyləncə gecəsinə baş çəkməyi planlaşdırır. Böyük Britaniyada beşinci yubiley tədbir zamanı Səbinə "When the Music Dies" müsabiqə mahnısını ifa edəcək.
