Gün ərzində yuxululuq, diqqət dağınıqlığı və baş ağrısı kimi simptomlar yuxu apnesi səbəbiylə ola bilər.
AZXEBER.COM Türkiyə mətbuatına istinadən xəbər verir ki, bu barədə Türkiyənin Nevrologiya Mütəxəssisi Dos. Dr. Buse Çağla Arı məlumat verib.
O verdiyi məlumatda deyib:
"Cəmiyyətdə düşünüləndən daha çox rast gəlinən yuxu apnesi yalnız xoruldama problemi deyil. Yuxu apnesi Alzheimer, insult və ürək xəstəlikləri riskini artırır".
Ətraf mühit faktorlarının böyük təsirə malik olduğunu vurğulayan Dos. Dr. Arı bildirib ki, bu problem nəzarət altına alınmazsa, həyat keyfiyyətini ciddi şəkildə aşağı sala bilər:
"Həddindən artıq çəki artımı və qeyri-sağlam qidalanma yuxu apnesinin inkişafında mühüm rol oynayır. Xüsusilə insulin müqaviməti, metabolik sindrom, ürək xəstəlikləri kimi hallar maddələr mübadiləsini ləngidir və apnenin əmələ gəlməsini sürətləndirir.
Boyun nahiyəsindən başlayan və başın yuxarı hissəsinə doğru yayılan sıxıcı baş ağrıları xəstələrdə xüsusilə səhərlər tez-tez rast gəlinir. Bunun xaricində gün ərzində həddindən artıq yuxululuq, diqqət dağınıqlığı, unutqanlıq kimi şikayətlərlə qarşılaşırıq. Müalicə edilməzsə, gələcəkdə Alzheimer və digər demans xəstəliklərinə yol aça bilər. Bundan əlavə, uzunmüddətli yuxu apnesi işemik xəstəliklərə və ürək-damar xəstəliklərinə səbəb ola bilər.
İlk növbədə, bir gecədə yuxu laboratoriyasında polisomnoqrafiya testi ilə xəstəni izləyirik. Yuxu apnesi aşkar edilərsə, PAP cihazı ilə müsbət hava təzyiqi tətbiq edərək xəstənin nəfəsini dayandırmasının qarşısını alırıq. Bu müalicə üsulu xəstənin yuxu zamanı oksigen səviyyəsini balanslaşdıraraq apne hücumlarının qarşısını alır".
Oksana
