Xarici ölkələrdən baha qiymətə alınaraq Şəki şəhərinin bəzədilməsi üçün istifadə olunan güllər naməlum şəxslər tərəfindən oğurlanıb.Bu utandırıcı əməlin sahibləri gecə vaxtı gülləri kökündən çıxararaq aparıblar. Oxşar vəziyyət şəhərin bir neçə ərazisində baş verib. Çıxarılan güllərin yerinə yeni güllər əkilsə də oğurluğu özünə peşə etmiş bu şəxslər eyni əməli təkrar törədirlər.İndiyədək 30-a yaxın gül kolu oğurlanıb. Əgər vəziyyət belə davam edərsə, yaxın bir neçə gündə bu gözəllikdən əsər-əlamət qalmayacaq. Belə oğurluq hadisələrinin qarşısını almaq üçün şəhər rəhbərliyi tərəfindən də müvafiq tədbirlər görülür.Demək olar ki, şəhərin bir çox ərazilərində quraşdırılan yeni kameralar vasitəsilə artıq gül oğrularını tapmaq elə də çətin olmayacaq.Qeyd edək ki, şəhərin bəzədilməsi üçün xarici ölkələrdən 25 adda 2 mindən yuxarı gül kolu gətirilib. M.Axundov prospektində, Qurcana çayının sağ sahilində, M.Axundov adına kinoteatrın önündə, Oğuz yolunun başlanğıcındakı dairədə, idman kompleksinin yaxınlığındakı dairədə və sair ərazilərdə müxtəlif rəngli güllərdən ibarət gözəl kompozisiyalar hazırlanıb.
//Şəki TV
