"Səsi olmayan hər kəs müğənnilik edir. Bu gün bir çox insanlar sənəti və mədəniyyəti ilə deyil, xarici görünüşü ilə gündəmə gəlirlər. Burnunu, dodağını və bədənini düzəltməklə mikrofonu qapıb danışa-danışa mənasız ifadələr səsləndirirlər”.
Bu fikirləri AZXEBER.COM-a açıqlamasında xalq artisti, Azərbaycan Prezidentinin fərdi təqaüdçüsü, kinorejissor, ssenarist və aktyor Şeyx Əbdül Mahmudbəyov deyib.
O bildirib ki, bəzi müğənnilər fin musiqiləri toylarda oxuyurlar:
"Millət belə müğənilləri dəstəkləyir, bu süni "uğur” sahiblərini toylara dəvət edir və onlara 10-15 min manat vəsait ödəyirlər. Onlar da hazırladıqları fon musiqilərini gətirib ifa edirlər. Toylardan bayağı fon musiqiləri, sənətlə əlaqəsi olmayan təqdimatlar uzaqlaşdırılmalıdır. Toylarımız ədəb, nəzakət, ailə dəyərləri üzərində qurulmalıdır. Xeyir işlərimiz bakirəliklə, xeyir-dua ilə başlamalıdır, səmimi, mədəni ab-hava yaradılmalıdır. İçki bolluğu, lazımsız təmtəraq, mənasız şou elementləri heç kimə fayda vermir və cəmiyyətə mənfi təsir göstərir. Belə qeyri-etik davranışlara görə boşanmaların sayı 60 faizə çatıb. Azərbaycanda kimin səsi yoxdursa, ailə vəziyyəti ağırdısa, müğənniliklə məşğuldur”.
Xalq artisti vurğulayıb ki, belə şəxslər isə müəyyən maraqlar ilə televiziyalarda gecə-gündüz təbliğ olunur:
"Baxırsan, televiziya kanalları həmin insanları dəvət edir. Onlar da efirdə oturub ard-arda qeybət edir, boş-boş danışırlar. Hər mövzuya səthi yanaşır, eyni tərzdə bir-birini təkrarlayan fikirlər səsləndirirlər. Halbuki bizim Tofiq Quliyev, Cahangir Cahangirov, Yusif Vəzirov, Emin Sabitoğlu, Arif Melikov, Fikrət Əmirov kimi dəyərli bəstəkarlarımız var. Bizim yüksək səviyyəli musiqiçilərimiz, möhtəşəm muğam məktəbimiz, zəngin mədəni irsimiz durduğu halda, televiziya məkanında bunların təbliği gedir. Azərbaycan televiziyaları kütləvi şəkildə cəmiyyətdəki əxlaq və mənəvi dəyərlərin aşınmasına səbəb olan kontentlərlə çıxış edirlər.
Onlar bunun müqabilində milyonlarla gəlir əldə edir. Bu isə televiziya adına yaraşan mədəni standartlara uyğun deyil. Bu cür verilişlər kütləvi şəkildə insanların psixologiyasına təsir edir, xüsusilə də gələcək nəsillərin əxlaq və həyat tərzində mənfi iz buraxır. Bu, ən azı ciddi mənəvi deqradasiyadır və ictimai məsuliyyətə ziddir”.
Ş.Ə. Mahmudbəyov qeyd edib ki,belə halların qarşısı alınmalıdır:
"Belə halların qarşısı alınmalı və televiziyalar məsuliyyətə cəlb edilməlidir. Çünki söhbət xalqın dəyərindən, mədəniyyətindən, sənətindən və əxlaqından gedir.
Hara baxır milli-mənəvi dəyərlərə cavabdeh qurumlar, hara baxır mədəniyyətlə məşğul olan dövlət strukturları? Televiziyalar Azərbaycan Respublikası Milli Televiziya və Radio Şurasının nəzarətindədir, ona görə də əsas məsuliyyət həmin qurumun üzərinə düşür”.
Şahanə Ziyad
