Bəs, ölkədə internetin sürətində problemlər varmı?
Azərbaycan İnternet Formunun Prezidenti Osman Gündüz məsələ ilə bağlı AZXEBER.COM-a fikirlərini bildirib.
O, deyilənlərin əksinə olaraq bildirib ki, ölkədə internetin sürəti artıb:
"Son dövrlərdə ölkədə internetin sürəti artıb. Məsələn, "Aztelekom"la "Baktelecom"a diqqət etdikdə görmək olar ki, aşağı sürətləri ləğv etdilər, buna görə narazılıqlar da oldu. Yəni bu provayderlər aşağı sürəti ləğv edib keçdilər yüksək sürətlərə. Biz də onun davasını edirik ki, bəzi adamlar üçün 10 mbit/s-i niyə saxlamayıblar? Onlar 10 mbit/s-i də ləğv edib 15-dən başlayıblar”.
Osman Gündüzün sözlərinə görə, ölkənin rayonlarında internetin sürətinin aşağı olması müşahidə oluna bilər:
"Ümumiyyətlə yanaşsaq, Azərbaycanda internetin sürətinin artması tendensiyası müşahidə olunur. Real vəziyyət belədir. Elə "Aztelekom"la "Baktelecom" buna misaldır. Yəni, bunlar yüksək sürət verə bilirdilər ki, aşağını ləğv etdilər. Əvvəl verə bilmirdilər. İndi onlar GPON (Gigabit Passive Optical Network) deyilən bir infrastrukturu qurdular, yəni fiber-optik infrastrukturu qurdular. Bu fiber-optik infrastruktur onlara imkan verdi ki, daha yüksək sürətlər versinlər. Amma deyim ki, bu, hələlik bütün ölkə üzrə deyil. Bütün ölkə üzrə regionlarda hələ ki, ADSL qalıb. Bunlar indi GPON texnologiya ilə fiber-optik çəkdilər. Onun aşağı sürətini ləğv edib, yüksək sürəti saxladılar. Amma ölkənin əksər rayonlarında ADSL qalıb. Onunla da yüksək sürət vermək olmur. Orada internet keyfiyyətsizdir. Onlar elə əvvəlki qaydadadır. Gərək orada da adıçəkilən qurumlar ADSL-i ləğv edib GPON-a keçsinlər ki, aşağı sürətlər ləğv olunsun və onlar da yüksək sürətə keçsinlər”.
Onu da qeyd edək ki, "Baktelecom" tariflərdəki dəyişikliklə bağlı məlumat yaymışdı:
"İstehlakçıların yüksək internet sürətinə artan tələbatı və texnoloji tələblər nəzərə alınaraq "Bakı Telefon Rabitəsi” MMC 4 mbit/s və 10 mbit/s tariflərini ləğv edərək abunəçilərin daha sürətli internetə keçidini təmin edir.
Bu məqsədlə GPON (Gigabit Passive Optical Network) 4 mbit/s və 10 mbit/s tariflərinin istifadəçiləri 6 avqust 2022-ci il tarixindən müvafiq olaraq 15 mbit/s və 30 mbit/s tarif paketinə köçürülür. Bu dəyişikliklə aşağı sürət tarifləri ləğv edilərək daha yüksək sürətə keçid təmin olunur ki, bu da qısa yükləmə müddətinə, həmçinin yüksək internet sürəti tələb edən onlayn xidmətlərdən və platformalardan yararlanmağa imkan verir”.
Aydın Nuri
