2015-ci ildə Bakı şəhərində nəqliyyat sahəsində islahatların keçirilməsi üçün prezidentin sərəncamı ilə Bakı Nəqliyyat Agentliyi yaradılmışdı.
Yarandığı gündən agentliyin fəaliyyətinin əsas məqsədi Bakı şəhərinin inzibati ərazisində nəqliyyat vasitələrinin və piyadaların təhlükəsiz, fasiləsiz və rahat hərəkətini təmin etmək idi.
Prezident BNA-nı yaradarkən onun qarşısında duran vəzifələri səsləndirmiş və ən əsası da Bakıda parkinq məsələsinin təəcili həll edilməli olduğunu bildirmişdi. Ölkə başçsının 2018-ci il 6 iyul tarixli fərmanı ilə BNA-ya parklamaya nəzarət, idarəetmə və daxil olan vəsaitdən istifadə ilə bağlı qaydalar da müəyyən etmək tapşırılmışdı. Prezidentin etimadı ilə yanaşı cəmiyyət tərəfindən də BNA-ya inam formalaşmış, hətta bu işin qurulmasına dəstək də ifadə edilmişdi. Ancaq ümidlər özünü doğrultmadı. Nəticədə cərimələrin sayının və qiymətlərinin çoxaldığı müşahidə olundu ki, bu da zaman-zaman cəmiyyətin müxtəlif təbəqələrində təmsil olunan şəxslər tərəfindən açıq bir dillə təndiq olundu.
Son olaraq ötən gün Prezident İlham Əliyevin sərəncamı ilə Bakı Nəqliyyat Agentliyi Bakı Şəhər İcra Hakimiyyətinin tərkibinə verildi, onun işinin təşkili BŞİH həvalə edildi.
Bəs, son 7 ildə BNA qarşıya qoyulan vəzifələrin öhdəsindən niyə gələ bilmədi? Buna səbəb nə idi?
BNA-nın fəaliyyətində çox ciddi qüsurların olduğunu Milli Məclisdəki çıxışlarında ifadə edən Rüfət Quliyev AZXEBER.COM-a açıqlamasında deyib ki, BNA uğursuz qurum kimi tarixə düşüb:
"Bu qurumun tarixinin analizi onu göstərir ki, həqiqətən də qurum tapşırılmış vəzifələri icra edə bilmədi. Deyə bilmərəm, neçə faizlik icra olundu, neçə faizlik olunmadı. Amma əsla bir konsepsiya kimi dövlətə və cəmiyyətə təqdim olunmadı. Möhtərəm Cənab Prezidentin bu addımı onu göstərir ki, hər bir məmur çalışıb işini vaxtında, tez, keyfiyyətli və yüksək standartlarla görməlidir. Bu, birmənalıdır. Burada başlıca problem BNA-nın vətəndaşlarla işi əvvəldən düzgün qura bilməməsi idi. Cərimədən öncə insanlarla maarifləndirici layihələr həyata keçirmək lazım idi".
Deputat parklanma yerləri olmadığı halda ancaq cərimələrin tədbiq edilməsinin cəmiyyətdə ciddi narazılığa səbəb olduğunu deyib. O, BNA-nın son yeddi ildə bir dənə də olsun köklü yeniliyə imza atmadığını əlavə edib:
"Mən bunu həmişə demişəm ki, cərimələrlə problem həll olunmur. İlk növbədə dövlət qurumu tərəfindən yeni təfəkkürlü bir baxış, ideya, mexanizm yaradılmalıdır. O mexanizm sonda həyata keçirilənə qədər yenə də cəmiyyətin, yəni Bakı sakinlərinin və qonaqların işinə də maneə olmamalıdır. Hamımız bilirik ki, Bakıda böyük tıxac problemi yaşanır. Bunun bir neçə səbəbi var. Dövlət hərtərəfli çalışır ki, yolları geniş etsin, yeni üsullar həyata keçirilsin. Amma biz gözləyirdik ki, Bakı şəhəri intelektual idarəetmə üsulu ilə inkişaf edəcək. Bu, həm sərnişinlərə, həm sürücülərə, həm də piyadalar aiddir. Əfasuslar olsun ki, bu 6 il yarımda bir yenilik yarana bilmədi. Tıxac problemi olduğu kimi qaldı. Cərimələrin artırılması da, gözlənildiyi kimi problemləri həll etmədi".
BNA-nın BŞİH-nin tərkibinə verilməsinə münasibət bildirərkən deputat Fazil Mustafa AZXEBER.COM-a qeyd edib ki, sağlam tənqidin faydası oldu:
"Bakı Nəqliyyat Agentliyi Prezidentin fərmanı ilə Bakı şəhər İcra hakimiyyətinın tabeliyinə verildi. Neçə ildir, bu qurumun mənasız fəaliyyətini gündəmə gətirirdim. Son çıxışım da bir həftə öncə olmuşdu. Demək ki, sağlam tənqidin faydası olur”.
AZXEBER.COM-a açıqlamasında nəqliyyat məsələləri üzrə ekspert Ərşad Hüseynov açıqlamasında məsələyə münasibət bildirib. O, BNA-nın əvvəldən düzgün istiqamət götürmədiyini deyib:
"BNA-nın üzərinə götürdüyü öhdəlikləri həll edə bilməməsinin müxtəlif səbəbləri var. Yanaşmaların düzgün olmaması, hədəflərin düzgün istiqamətdə olmaması, müxətlif dövlət qurumları ilə koordinasiyalı əlaqələrin olmaması kimi səbəbləri göstərmək olar. Son üç ildə dayanma-durma ilə ağlı cərimələrin təşkilinə xüsusi diqqət göstərildi. Təbii ki, o da çıxış yolu deyildi. Bu cür ümumi yanlışlıqlar bu problemlərə səbəb oldu. O ki qaldı, BNA-nın BŞİH-nin tabeliyinə verilməsinə, bundan sonra nələrin dəyişəcəyini dəqiq demək bir az çətindir. Çünki BŞİH də indiyədək nəqliyyat infrastrukturu ilə bağlı hansısa parlaq layihənin müəllifi olmayıb. Hər şey bərbad olacaq və ya hər şey çox yaxşı olacaq demək düzgün deyil. Bu səbəbdən gözləmək lazımdır”.
Aydın Nuri
