23-27 aprel, 2012-ci il tarixlərində İtaliyanın Turin şəhərində Beynəlxalq Əmək Təşkilatı “Əlilliyi olan insanların əmək bazarına inklüziyası” mövzusunda təlimlər keçirir. AZXEBER.COM-un məlumatına görə, “Sosial Xidmətlər Təşəbbüsü” İctimai Birliyinindən iki nəfər hazırda bu təlimdə iştirak edir.
Təlimin əsas məqsədi inkişaf etmiş və etməkdə olan ölkələrin əlillik və inklüziya sahəsindəki təcrübələri, beynəlxalq konvensiya və qanunvericilik, dünya əmək bazarı və əlilliyi olan insanların sosial–iqtisadi inteqrasiyası və inklüziya sahəsindəki son tendensiyalar barədə iştirakçıları məlumatlandırmaq, əlilliyi olan şəxslərin işlə təmin edilməsində yeni metodologiyaları təbliğ etməkdir.
“Sosial Xidmətlər Təşəbbüsü” İB təlimdə iştirak etməklə Azərbaycanda əlilliyi olan insanların əmək bazarına və bütövlükdə cəmiyyətə inteqrasiyası istiqamətində yeni mütəşəkkil təcrübə qazanmaq və onu ölkədə tətbiq etmək üçün bilik və təcrübə əldə edir.
Məlumat üçün bildirək ki, hazırda dünya əhalisinin təqribən 10 faizini əlilliyi olan insanlar təşkil edir. Xüsusilə, dünyanın inkişaf etməkdə olan və zəif inkişaf etmiş ölkələrində bu insanların çox kiçik qismi iş fəaliyyətinə cəlb edilmişdir. Azərbaycanda yaşayan 490 minə yaxın əlilliyi olan insanın cəmi 4.5 faizi işlə təmin olunub.
Qeyd edək ki, bu ilin may ayında əlilliyi olan insanlara yönəlmiş xidmətlər sisteminin keyfiyyət və növlərinin artırılması istiqamətində yeni inkluziv metodların və əlillərin reabilitasiyasında sosial-tibbi yanaşmanın tətbiqinə dair Sosial Xidmətlər Təşəbbüsü təşkilatı və Əmək və Əhalinin Sosial Müdafiəsi Nazirliyi növbəti birgə əməkdaşlığa start verəcək.
