“Sujetin çəkilməyinə əsas səbəb gözdən pərdə asmaqdır”.
“Space” televiziyası ilə bağlı redaksiyamıza bəzi məlumatlar daxil olub. Adının açıqlanmasını istəməyən telekanal işçilərindən birinin AZXEBER.COM-a verdiyi məlumata görə, hazırda "Space"də vəziyyət gərgin olaraq qalır. Onun sözlərinə görə, kanal rəhbərliyi işçilərin iştirakı ilə yeni sujet hazırlayır. Bu sujetdə hamı öz işindən razılıq etməyə məcbur edilib:
“Ümumiyyətlə burada hər kəs maaşlarından narazıdır. Çünki 200 manat əməkhaqqı ilə heç kim razılaşa bilməz. Amma işimizdən razı olmağımızı təsdiq etmək üçün iş zamanı sujet hazırlayırlar ki, iş gedir və hər şey superdir. Hazırda bu sujetin çəkilişləri başlanılıb və yeni sezonda tamaşaçılara təqdim olunacaq. Əslində isə maddi-texniki baza çox zəifdir. Kompüterlərin əksəriyyəti iş üçün yararsızdır və demək olar ki, qırıq-qırıqdır. Kameralar və ştativlər isə pis gündədir. Buradakı işçilərin heç biri normal şəraitdə işləmir. Sujetin isə çəkilməyinə əsas səbəb gözdən pərdə asmaqdır”.
Adının açıqlanmasını istəməyən mənbə son günlər mətbuatda yayımlanan xəbərlərin doğru olduğunu söyləyib. Belə ki, “Space TV-nin "Hər səhər" proqramının aparıcısı, tanınmış aktyor, əməkdar artist Əkbər Əlizadənin ötən gün canlı yayımda işdən ayrılacağını elan etməsi böyük səs-küyə səbəb olmuşdu.
Mənbənin sözlərinə görə, Ə.Əlizadənin bu addımı çoxlarında stimul yaradıb:
“O ki qaldı Əkbər Əlizadənin işdən ayrılmasına, onun haqqında yazılan xəbərlərin hamısı doğrudur”.
AZXEBER.COM portalı olaraq sözügedən iddialarla bağlı “Space” televiziyası ilə əlaqə saxlamağa çalışsaq da, bütün cəhdlərimiz nəticəsiz qaldı.
