ÜST-dən xəbərdarlıq: Bu vərdiş sonsuzluq riskini artıra bilər
SOSİAL
21:54 13.09.2026
1138
Bu barədə Anadolu Agentliyi məlumat yayıb.
ÜST 2000-2026-cı illəri əhatə edən və tütün istifadəsinin qadın və kişilərin reproduktiv sağlamlığına təsirini araşdıran hesabat yayımlayıb.
Hesabatda tütün istifadəsinin insan həyatının istənilən mərhələsində sonsuzluğa səbəb ola biləcəyi qeyd olunub. Tütün istifadə edən qadınlarda sonsuzluq riskinin siqaret çəkməyənlərlə müqayisədə 40 faiz daha yüksək ola biləcəyi bildirilib.
Sənəddə passiv siqaretçəkmənin də reproduktiv sağlamlığa təsir göstərə biləcəyi və bu riskin siqaret çəkməyən insanlara da aid olduğu vurğulanıb.
ÜST siqareti tərgitməyin tütün istifadəsinin yaratdığı zərərlərin azalmasına kömək edə biləcəyini açıqlayıb. Hesabatda əvvəllər siqaret çəkmiş qadınlarda sonsuzluq riskinin hazırda siqaret çəkən qadınlarla müqayisədə 25 faiz daha aşağı olduğu qeyd edilib.
Həmçinin siqaret çəkən kişilərin cinsi funksiyalarla bağlı daha çox problem yaşaya biləcəyi bildirilib. Tütün istifadəsinin sonsuzluğun müalicəsinin uğurlu nəticələnmə ehtimalını da azalda biləcəyi vurğulanıb.
ÜST elektron siqaret, tüstüsüz tütün, qəlyan və digər tütün məhsullarının insan sağlamlığına təsiri ilə bağlı isə əlavə elmi araşdırmalara ehtiyac olduğunu bildirib.
OXŞAR XƏBƏRLƏR
ƏN SON XƏBƏRLƏR
