Tanınmış meyxanaçı Rəşad Dağlı indi də restoran biznesinə girişib. 4 ay bundan əvvəl bütün pis vərdişlərinə "əlvida" deyib ailə həyatı quran Rəşad Dağlı indi də iş adamı olub. Meyxanaçının yaxın ətrafından verilən məlumata görə, Rəşad restoran biznesinin bütün qayda-qanunlarına lazımınca əməl edir. İşçilərin xarici görünüşündən tutmuş uniformasınadək hər şey Rəşad Dağlı üçün xüsusi önəm daşıyır. Meyxanaçı tanınmamaq üçün sahibi olduğu restorana başlıqlı jaketlə (kapyuşon) girib-çıxır. Deyəsən, bu məsləkdə məşhurluğu ona əməlli-başlı mane olur.
Sənətçinin yeni açdığı restoranın müştərisi olmadığımızdan xidmətin keyfiyyətindən söz aça bilmərik. Hər halda sənət adamlarının gündə bir paltar mağazası və ya gecə klubları açılışına reklam xatirinə medianın dəvət olunduğu bir dövrdə Rəşad Dağlının belə bir reklamdan imtina etməsi müəmmalıdır...
Xəbəri dəqiqləşdirmək və bu işdə ona uğurlar arzulamaq istəyilə Rəşadla telefon bağlantısı yaratdıq. Telefonu qaldıran köməkçisi Mahir sualımızı cavablandırmaq əvəzinə, bizdən bu məsələ ilə nəyə görə maraqlandığımızı soruşdu. Biz də Rəşadın tanınmış sənət adamı olduğunu yada salıb, heç bir məqsəd güdmədiyimizi, sadəcə bir jurnalist kimi məlumatı Rəşadın öz dilindən dəqiləşdirmək istədiyimizi söylədik. Yalnız bundan sonra meyxanaçı bizi qane edən cavabı verərək, gələcək müsahibələrdə görüşmək arzusu ilə sağollaşdı. Bizə də öz növbəmizdə Rəşad Dağlıya yeni biznesində uğurlar arzulamaq qaldı.
//Ans Press
