Tanınmış aparıcı, Lider Televiziyasının xəbər spikeri Mehman Mehdiyev Regional Televiziyanın şənbə - bazar şousu olan “İki miz” verilişinin qonağı olub.AZXEBER.COM-un məlumatına görə, verilişdə “Müasir cəmiyyətdə informasiyanın rolu” mövzusu müzakirə olunub. Qonaq aparıcıların nitq qüsurları, cəmiyyətdə özlərini aparması və digər məqamlara münasibət bildirib. O qeyd edib ki, əksər xəbər aparıcılarında standart suflyor asıllılığı var: “Əslində suflyor aparıcı ilə tamaşaçı arasında bir vasitədir ki, onların birbaşa kontaktı olsun. Bu zaman aparıcı üçün jest etməyə imkan yaranır. Bəzən aparıcılar suflyor olmadıqda proqramı davam etdirə bilmir. Bu da onların söz ehtiyyatı olmamasından irəli gəlir”.
Mehman Mehdiyev bildirib ki, aparıcının xəbəri təqdim edərkən əl qol hərəkətləri və digər bu kimi jestlərdən istifadə etməsi müəyyən məqamlarda, yəni, təbii halda baş verdikdə qəbul olunur. Ancaq artıq əl hərəkətləri, üz ifadələri yersizdir.
Aparıcının müvafiq sualına cavab olaraq tanınmış spiker bildirib ki, xəbər sujetində musiqidən istifadə etmək düzgün deyil: “Mənə elə gəlir ki, musiqili videolar tamaşaçıya əsas xəbəri almaqda mane olur, diqqəti yayındırır. Elə sujetlər olur ki, orada musiqidən istifadə etmək olar. Ancaq əksər hallarda musiqi artıqdır”.
Xəbər spikerininin efirə gedən xəbərdən sonra şərh verməsinin düzgün olub olmaması ilə bağlı suala qonaq belə münasibət bildirib: “Bu birmənalı şəkildə qəbulolunan deyil. Xəbər aparıcısının hansısa sujetə şərh verməsi məni bir tamaşaçı olaraq maraqlandırmır. Biz aparıcıların münasibətinin tamaşaçılara heç bir aidiyyatı yoxdur”. Mehman Mehdiyev bildirib ki, hazırda əksər telekanallar adi məlumatları “Şok” başlıqlarla tamaşaçıya təqdim edərək onları aldadırlar.
Mehman Mehdiyevin şounun aparıcısının “Xəbər spikerinin toylarda tamadalıq etməsinə necə baxırsız” – sualına da cavabı birmənalı olub: “Xəbər aparıcısı madiyyat duydu, duymadı gözünü toylara dikməməlidir. Düşünürəm ki, o, kanalın simasıdır. Xəbər aparıcısının toylarda aparıcılıq etməsinə pis baxıram”. Daha sonra zarafatla əlavə edib ki: “Amma bəzi aparıcıların mahnı oxumasını görsəm də təəccüblənmərəm”.
Qonaq, aparıcıların tələffüz, nitq qüsurları ilə bağlı məsləyə toxunarkən maraqlı açıqlamalar verib. Bildirib ki, aparıcı və müxbirlər Azərbaycan ədəbi dilinin daşıyıcılarıdır. Peşəkar xəbər aparıcısı qeyd edib ki, regionda fəaliyyət göstərməsinə baxmayaraq RTV-nin aparıcı və müxbirləri paytaxtda fəaliyyət göstərən əksər aparıcılardan düzgün danışır. O, bərpa olunan nitq qüsurlarından danışarkən uşaqlıqda düşdüyü maraqlı situasiyanı açıqlayıb. Bildirib ki, uşaqlıqda bağçaya gedərkən müəllimləri onun nitqində ciddi qüsur olduğunu deyib. Hətta, müəllimlərin məsləhəti ilə qısa bir müddətdə loqoped kurslarına da gedib. Sonra valideynləri cəmiyyətin qınağından çəkinərək onu kursdan uzaqlaşdırıb. Valideynlərinin onun gələcəkdə fikrini ifadə edə bilməyəcəyindən qorxuya düşdüyünü deyən aparıcı, uşaqlıqda onun nitqində qüsur olduğunu düşünən müəlliminə bu sözləri demək istədiyini bildirib: - Sizin dediyiniz həmin o “loqoped uşaq” bu gün Azərbaycan ədəbi dilinin daşıyıcılarındandır.
