'“Prezidentin gənclər təşkilatlarına verdiyi dəstək, onlar üçün hazırlanan dövlət proqramları, xüsusilə xaricdə təhsil proqramları, gənclərin intellektual inkişafına yaradılan şərait və dövlət strukturlarında təmsil olunmaları kimi faktlar gənclərin seçkilərdə İlham Əliyevi dəstəkləməsi üçün əsas səbəbdir”. Bunu Azərbaycanlı Gənclərin Avropaya İnteqrasiya Təşkilatının (AGAT) sədri Gülsel Səfərova deyib.

Onun sözlərinə görə, ölkə prezidenti gənclər təşkilatlarının fəaliyyətinə verdiyi töhvələrlə onların rəğbətini qazanıb: “Son 10 ildə Azərbaycanda iqtisadi və siyasi stabillik təmin olunub. Məhz İlham Əliyevin prezidentliyi dövründə “Azərbaycan – 2020: gələcəyə baxış” konsepsiyası qəbul olunub ki, bu da Azərbaycan vətəndaşını 2020-ci ilə qədər ölkəsində baş verəcək inkişafdan xəbərdar edib. Biz gənclər əminik ki, İlham Əliyev növbəti dəfə prezident seçildikdən sonra da mövcud uğurlu siyasi kursu davam etdirəcək”.

Gülsel Səfərova bu gün təsis olunan “Milli Şura”nın fəaliyyətinə də münasibət bildirib: “Bu gün Yeni Azərbaycan Partiyasının V Qurultayının keçirilməsilə yanaşı, müxalifət düşərgəsi tərəfindən “Milli Şura” təsis edilib. Təəssüf edirəm ki, ölkəmizdə sosial bazası və fikir birliyi olmayan yeni bir qurum yaradılıb. Əminəm ki, bu “Şura” seçkilərə çox qısa zaman qalmış yenidən vahid namizəd seçmək problemi yaşayacaq və fəaliyyətsizliyi ilə seçiləcək”.

//SİA