14 oktyabr 2017 – ci il tarixində "Təhlükəsiz yol, yaxşı yol” layihəsinin açılış mərasimi keçirilib.
AZXEBER.COM-un məlumatına görə, açılış mərasimində dövlət qurumlarının və gənclər təşkilatlarının nümayəndələri də iştirak ediblər. İlk növbədə qonaqları salamlayan "Gənclərin Dostluq Şəbəkəsi” İctimai Birliyinin sədri İmaməddin Quliyev layihənin məqsədi ilə bağlı iştirakçıları məlumatlandırdı.
O, qeyd
etdi ki, layihə çərçivəsində layihəyə cəlb olunan təcrübəli ekspert və təlimçilər
tərəfindən seçilmiş 30 gənc iştirakçıya 15 dərs proqramına uyğun olaraq şəhər nəqliyyatında,
yollarda ictimai davranış qaydaları, təhlükəsiz gənc sürücü, dönmə əməliyyatı,
icazə verilən maksimum hərəkət sürətləri, nizamlayıcının göstərişləri, qəza nişanları,
minik avtomobillərinin idarə olunması və s. digər mövzularda qeyri – formal təhsil
metodundan istifadə olunaraq təlimlər və praktiki məşğələlər təşkil
olunacaqdır.
Sonra
çıxış üçün söz qonaqlara verildi.
Bakı
Şəhər Baş Dövlət Yol Polis İdarəsinin ictimaiyyətlə əlaqələr şöbəsinin rəisi,
polis polkovniki Vaqif Əsədov çıxış
edərək, yollarda təhlükəsizliyin təmin edilməsində bu və ya buna bənzər layihələrin
təşkilini yüksək qiymətləndirdiyini qeyd etmişdir. O, bu istiqamətdə gərək təkcə
Dövlət yol Polisinin əməkdaşları deyil, o cümlədən vətəndaş cəmiyyətinin ən fəal
hissəsini özündə birləşdirən gənclər və gənclər təşkilatlarının birgəfəal
iştirakını məqsədə uyğun hesab etmişdir. Hər kəs öz üzərinə düşən məsuliyyəti
hiss etməlidir. Dövlət Yol Polisinin təbliğat işi aparmaqda, hərəkəti təşkil
etməkdə, həmçinin inzibati qaydada protokol tərtib etməkdə məqsədi təhlükəsizliyi
təmin etməkdir. Bu gün hər bir hərəkət iştirakçısı sözügedən sahədə əlindən gələni
etməlidir. Sonda o layihə iştirakçılarına uğurlar arzu edərək, onların
suallarını cavablandırmışdır.
Sonra
Bakı Nəqliyyat Agentliyinin (BNA) İctimaiyyətlə əlaqələrvə maarifləndirmə
şöbəsinin müdiri Mais Ağayev çıxış
edərək bu istiqamətdə keçirilən layihələrin önəmli olduğunu və daim maarifləndirmə
işlərinin aparılmasının vacibliyini qeyd etmişdir. O, Bakı Nəqliyyat
Agentliyinin keçirdiyi yeni layihələr və görülən işlər barəsində iştirakçıları
məlumatlandırmış və onların suallarını cavablandırmışdır.
Sonda söz "BELC” təhsil kompleksinin direktoru və eyni zamanda "Təhlükəsiz yol, yaxşı yol” təlimçisi Xalid Səlimov çıxış edərək, layihədə nəzərdə tutulan dərs proqramı haqqında iştirakçıları məlumatlandıraraq, onlara uğurlar arzu etdi.
Qeyd edək ki, Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının dəstəyi və "Gənclərin Dostluq Şəbəkəsi” İctimai Birliyinin təşkilatçılığı ilə keçirilən layihənin icrasının başlıca məqsədi tələbə və gənc sürücü və piyadaların yol hərəkəti qaydalarına dair bilik və bacarıqlarının artırılması, onlara təhlükəsiz davranış vərdişlərinin aşılanması, intellektual idarəetmə sistemi haqqında ətraflı məlumat verərək bu istiqamətdə nəzəri və praktiki biliklərin verilməsi, cəmiyyətdə sürücülük mədəniyyətinin səviyyəsini yüksəltmək və yol təhlükəsizliyin təmin olunmasında məlumatlılığın artırılmasından ibarətdir.
