Smartfon istifadəçiləri arasında ən çox müzakirə olunan məsələlərdən biri də telefon batareyasının necə doldurulmalı olmasıdır. Bəziləri cihazı mütləq 100 faizə qədər enerji ilə təmin etməyin vacib olduğunu düşünür, digərləri isə bunun batareyanın ömrünü qısaltdığını iddia edir. Bəs həqiqət nədir?
AZXEBER.COM xəbər verir ki, mütəxəssislərin sözlərinə görə, müasir smartfonlarda istifadə olunan litium-ion batareyalar tam dolduqdan sonra enerjinin qəbulunu avtomatik dayandırır. Bu səbəbdən telefonu hər dəfə 100 faizə qədər doldurmaq birbaşa batareyanı sıradan çıxarmır.
Lakin ekspertlər bildirirlər ki, batareyanın uzunömürlü olması üçün onu davamlı olaraq 0 faizə qədər boşaltmaq və ya uzun müddət 100 faizdə saxlamaq tövsiyə edilmir. Optimal istifadə üçün enerji səviyyəsinin təxminən 20-80 faiz arasında saxlanılması daha məqsədəuyğun hesab olunur.
Texnologiya mütəxəssisləri onu da qeyd edirlər ki, sürətli enerji doldurma funksiyası gündəlik istifadə üçün təhlükəli olmasa da, telefonun həddindən artıq isinməsi batareyanın kimyəvi quruluşuna mənfi təsir göstərə bilər. Xüsusilə cihazın günəş altında və ya yüksək temperaturda enerji yığması batareyanın ömrünü azalda bilər.
Bundan başqa, gecə boyu telefonu şarjda saxlamaq əvvəlki nəsil telefonlarda risk hesab edilsə də, yeni modellərdə enerji idarəetmə sistemləri sayəsində bu problem böyük ölçüdə aradan qaldırılıb. Bir çox istehsalçı telefonun istifadə vərdişlərini öyrənərək gecə saatlarında enerji yığımını ləngidir və 100 faizə yalnız istifadəçiyə yaxın saatlarda çatdırır.
Mütəxəssislər bildirirlər ki, batareyanın ömrünü uzatmaq istəyən istifadəçilər orijinal adapter və kabeldən istifadə etməli, telefonu həddindən artıq isti mühitdə şarj etməməli və mümkün olduqda enerjini 20-80 faiz aralığında saxlamağa çalışmalıdırlar.
Şahanə Ziyad
