Marmara Üniversiteti Halkla İlişkiler (PR) fakültəsinin magistr tələbələri Türkiyədə erkən yaşda evləndirilən qızlara diqqət çəkmək məqsədi ilə sosyal kampaniya həyata keçirib.
“Yaşında Güzel” adlı kampaniya çərçivəsində sosial çarx yayımlayan tələbələr arasında həmyerlimiz də var. Türkiyədə magistr təhsili alan Rəşad Mehdizadə kampaniya haqqındakı fikirlərini AZXEBER.COM-la bölüşüb:
“Statistikalar göstərir ki, Türkiyədə təxminən qadınların 32 faizi erkən yaşda evləndirilir. Bu çox böyük rəqəmdir. Hər 3 qadından birinin erkən yaşda evləndirliməsi gələcək üçün böyük təhlükədir. Biz də Marmara Üniversiteti Halkla İlişkiler magistr tələbələri olaraq, ictimaiyyətin diqqətini buna çəkməyə çalışdıq. Kampaniya çərçivəsində “Herseyyasindaguzel” adlı sosial çarx ərsəyə gətirdik. Videoda erkən yaşda evləndirilən qızların uşaqlıqlarını yaşamadan həyata atılması vurğulanıb”.
Bu tip olayların ölkəmizdə baş verməməsindən məmnunluq hissini ifadə edən Rəşad Mehdizadə Türkiyənin isə bundan əziyət çəkməsinin üzücü olduğunu söylədi:
“Şükürlər olsun ki, ölkəmizdə erkən yaşda qızların evləndirilməsi hallarına demək olar ki, rast gəlmirik. Lakin bu hadisələr qardaş ölkə Türkiyənin ən böyük problemlərindəndir. Biz də öz növbəmizdə bu olaylara işıq tutmaq istədik”.
Kampaniyaya Azərbaycandan da dəstəklərini gözlədiyini deyən həmyerlimiz ictimaiyyətimizin bu mövzuya həssas yanaşacağına inanır:
“Kampaniyamıza dəstək olmaq istəyənlər də öz növbəsində videolarımızı izləyədikdən sonra, #herseyyasindaguzel etiketi ilə Facebook, Twitter ve Instagram hesablarından uşaqlıq şəkillərini paylaşa bilərlər”.
