Türkiyə mətbuatında Macarıstanın Budapeşt Paytaxt Məhkəməsinin 2006-cı il 13 aprel tarixli hökmü ilə ömürlük azadlıqdan məhrum etmə cəzasına məhkum edilmiş Azərbaycan Ordusunun zabiti Ramil Səfərovun avqustun 31-də Bakıya gətirilərək Prezident İlham Əliyevin Sərəncamı ilə əfv olunması barədə materiallar yayımlanıb.
Materiallarda qeyd olunur ki, 2004-cü ildə NATO-nun “Sülh naminə tərəfdaşlıq” proqramı çərçivəsində təlimlərdə iştirak edən azərbaycanlı zabit Ramil Səfərov erməni zabit tərəfindən ağır təhqir və psixoloji təxribata məruz qalmışdır. Bu səbəbdən də Ramil onu qətlə yetirmişdir. Azərbaycan Ordusunun zabiti Ramil Səfərov Azərbaycana ekstradisiya edilmişdir. Ramil Səfərov Prezident İlham Əliyevin Sərəncamı ilə əfv olunub.
Mətnlərdə Macarıstanda məhkum həyatı yaşayan Ramil Səfərovun Azərbaycana ekstradisiya edilməsi və Prezident İlham Əliyev tərəfindən əfv olunmasının Azərbaycanda sevinclə qarşılandığı bildirilir.
Azərbaycanda xəbərin yayılmasından sonra sosial şəbəkələrdə Ramil Səfərovun azadlığa buraxılması ilə bağlı təbrik mesajları göndərilir.
