Xocalı faciəsi tarixin yaddaşında qalan və heç bir zaman unudulmayacaq qara ləkədir.
AZXEBER.COMxəbər verir ki, bunu Türkiyənin hakim Ədalət və İnkişaf Partiyasının (AKP) sədr müavini Ravza Kavakcı yazılı açıqlamasında bildirib.
R.Kavakcı qeyd edib ki, 26 il bundan əvvəl erməni silahlı dəstələri Azərbaycan vətəndaşlarına qarşı misli görünməmiş vəhşilik, cinayət törədiblər.
AKP-nin sədr müavini vurğulayıb ki, özünü insan haqlarının müdafiəçisi kimi təqdim edən qərb təəssüflər olsun ki bu faciəyə hələ də səssiz qalıb:
"Bir daha bu kimi qanlı faciənin təkrar olunmaması üçün dayanmadan çalışırıq. Azərbaycanlı qardaşlarımızın acı faciəsini yad edir, dərdlərini bölüşürük".
Xatırladaq ki, 1992-ci il fevralın 26-da Ermənistan hərbi birləşmələri 7 min əhalisi olan Xocalı şəhərində soyqırımı aktı həyata keçirib. Xocalı soyqırımı zamanı 613 nəfər öldürülüb, 1000 nəfər müxtəlif yaşlı dinc sakin aldığı güllə yarasından əlil olub. 106 qadın, 63 azyaşlı uşaq, 70 qoca qətlə yetirilib. 8 ailə tamamilə məhv edilib, 25 uşaq hər iki valideynini, 130 uşaq isə valideynlərindən birini itirib. Faciə baş verən gecə 1275 dinc sakin əsir götürülüb, onlardan 150-nin taleyi hələ də məlum deyil.
