Türkiyənin nüfuzlu Özyeğin Universitetinin dekanı BDU-da (FOTOLAR)
GƏNCLİK
18:44 28.10.2011
1738
Bu gün Bakı Dövlət Universitetində Qafqaz Universiteti, Türkiyənin Özyeğin Universiteti və BDU-nun birgə təşkilatçılığı ilə keçirilən “İnformasiya-Kommunikasiya Texnologiyaları və Şəxsiyyət Hüquqları” adlı II Beynəlxalq Türkiyə-Azərbaycan elmi-praktiki simpoziumun plenar iclası öz işinə başlayıb.Bakı Dövlət Universitetinin Mətbuat və Informasiya şöbəsindən AZXEBER.COM-a verilən məlumata görə, tədbiri açan BDU-nun rektoru, akademik Abel Məhərrəmov simpoziumun əhəmiyyətindən danışıb. Məlum olub ki, simpoziumun keçirilməsində məqsəd Azərbaycanda hüquq elminin davamlı inkişaf etdirilməsini təmin etmək, elmi kadrların hazırlıq səviyyəsini daha da artırmaq, qardaş Türkiyə Respublikasının hüquqşünas alimləri ilə elmi əməkdaşlığı inkişaf etdirmək və informasiya-kommunikasiya texnologiyalarının hüquq elminin müxtəlif sahələrinə, xüsusilə şəxsiyyət hüquqlarına təsiri ilə bağlı problemlərə dair elmi tədqiqatların müzakirəsini təmin etmək və bunun nəticələrini hüquq ictimaiyyətinə çatdırmaqdır. Azərbaycanda elmə, təhsilə böyük önəm verildiyini deyən akademik, ölkənin iqtisadi potensialını intellekt kapitalına çevirməyin vacibliyini xatırladıb. Sonra Qafqaz Universitetinin prorektoru, professor Cihan Bulut, Özyeğin Universitetinin hüquq fakültəsinin dekanı, professor Yener Ünver və Bakı Dövlət Universitetinin hüquq fakültəsinin dekanı, professor Əmir Əliyev çıxış ediblər.Qeyd edək ki, altı bölmədən ibarət olan simpozium iki gün davam edəcək.
