13 iyun Azərbaycanda səfərdə olan Rəcəb Tayyib Ərdoğan Türkiyənin Şuşada baş konsulluq açmaqda hazır olduğunu bildirib.
"Cənab Prezident dayanmır. Çox qısa müddətdə tikilən birmərtəbəli də olsa, o binalarla bura bir hərəkət gətirdi. Amma Şuşaya qoyulacaq mehmanxana investisiyaları onu həm də cazibə mərkəzinə çevirəcək. Biz də Şuşada Baş Konsulluq açırıq”,- deyə Türkiyə prezidenti əlavə edib.
Rəcəb Tayyib Ərdoğanın Azərbaycana səfəri zamanı verdiyi mühüm mesajlarla bağlı Milli Məclisin deputatı Naqif Həmzəyev AZXEBER.COM-a açıqlama verib.
"Türkiyə Cümhuriyyətinin Prezidenti Rəcəb Tayyib Ərdoğan ənənəyə sadiq qalaraq ilk rəsmi dövlət səfərini Şimali Kipr Türk Respublikasından sonra Azərbaycana etdi.
Səfər zamanı Ulu öndər Heydən Əliyevin məzarı və Şəhidlər Xiyabanı ziyarət edildi. İlham Əliyevlə ikitərəfli və çoxtərəfli görüşlər keçirildi. R.T Ərdoğan yeni vəzifəyə gətirilmiş nazirləri cənab prezidentə təqdim etdi. Bu günə qədər birgə işləmiş nazirlər yeni komanda ilə qarşıya qoyulmuş hədəflərə çatmaq üçün fəaliyyətə davam edəcəklər.
Rəcəb Tayyib Ərdoğan Şuşa şəhərində baş konsulluq açılmasına hazır olduqlarını vurğuladı. Şuşada konsulluğun açılması təkcə Ermənistan üçün yox, Ermənistanın havadarları üçün önəmli mesaj idi.
Zəngəzur dəhlizinin açılması ilə bağlı da çox önəmli mesajlar verildi. Bu məsələdə bir daha sonuna qədər Azərbaycanı dəstəklədiyini səsləndirmiş oldu. Şərqi Zəngəzurun dirçəlməsi, bərpa edilməsində Türkiyə şirkətlərinin yaxından iştirakını davam etdiyəcəyini vurğuladı. Türkiyə prezidenti seçkidə dəstəyə görə Azərbaycana təşəkkürlərini çatdırdı”.
Naqif Həmzəyev qeyd edib ki, Ərdoğan demoqrafik məsələlərə də toxunub:
"Azərbaycan əhalisinin sayının artırılması ilə əlaqədar ailədə 5 uşağın olmasının vacibliyini səsləndirib. Həmçinin yaxın zamanda Türkiyə-Azərbaycan birgə Universitetinin fəaliyyətinin şahidi olacağımızın mesajını verdi. Azərbaycan ordu quruculuğunda Türkiyə modelinin əsas götürülməsi, birgə təlimlərin keçirilməsi, Azərbaycan ordu modelinin Türkiyə ordu modelinə uyğun inkişaf etdirilməsinə dəstək olacağını bəyan etmiş oldu. Ərdoğanın Azərbaycana səfəri münasibətlərimizin inkişaf etdirilməsinə, ticarət dövriyyəsinin artırılmasına birgə beynəlxalq layihələrdə iştiraka əla fürsət vermiş oldu. Bu səfərdən sonra birlikdə daha da böyük uğurlara imza atılacaq.
Zəngəzur dəhlizinin açılması türk dövlətlərinin bir-birinə intiqrasiya etməsinə, ticarət dövriyyəsinin artmasına böyük təkan olacaq”.
Şəbnəm Zahir
