Bu gün futbol üzrə Azərbaycan çempionatında yeni mövsümə start verilir. Lakin çempionatın hələ də sponsoru yoxdur. 2009-cu ildən çempionatın maliyyə dəstəkçisi olan “Unibank”la müqavilənin müddəti bu ilin may ayında başa çatıb. Və müqavilə müddəti uzadılmayıb. Son zamanlar mətbuatda Peşəkar Futbol Liqasının (PFL) bankdan daha çox vəsait istədiyi, tərəflərin bu səbəbdən anlaşa bilmədiyi haqda xəbərlər dolaşırdı. Lakin PFL-dən “Unibank”la əməkdaşlığa davam edəcəkləri və şərtlərdə anlaşdıqları bildirilirdi. Rəsmi müqavilənin imzalanmamasına səbəb kimi isə məsul şəxslərin məzuniyyətdə olması göstərilirdi. PFL prezidenti Ramin Musayev məsələyə çempionatın startına qədər aydınlıq gələcəyini qeyd etmişdi. Məlum olduğu kimi bu gün çempionat başlasa da, sponsor məsələsi hələ də həllini tapmayıb. Bu məsələyə aydınlıq gətirmək üçün R. Musayevlə əlaqə saxladıq.
