Sentyabrın 25-də Bakı SOS Uşaq Kəndində Bakcell şirkətinin dəstəyi ilə Beynəlxalq Sülh Gününə həsr edilmiş “Uşaqlar Sülhə səsləyir” adlı tədbir keçiriləcək.Xatırladaq ki, düz bir il öncə, məhz Beynəlxalq Sülh Günündə "BAKCELL STARS" layihəsi çərçivəsində SMS kampaniyasına start verilmiş, bu kampaniyadan toplanmış 45 min manatlıq vəsait SOS uşaqlarının hərtərəfli inkişafına töhfə edilmişdir. Minlərlə Bakcell abunəçisi bu alicənab təşəbbüşdə iştirak edərək sms- lər vasitəsilə ianələrini etmişlər. Toplanmış vəsait uşaq xorunun yaradılmasına, "Bacarıqlı əllər" dərnəyinin fəaliyyətinə, SOS yetirmələrinin milli rəqslə məşğul olmalarına və digər incəsənət yönümlü fəaliyyətlərə xərclənməkdədir.Təşkilatın keçirdiyi istənilən tədbir il ərzində mənimsənmiş bacarıqları nümayiş etdirmək üçün gözəl bir fürsətdir.Bu dəfə beynəlxalq sülh gününə həsr edilmiş tədbirdə bir qrup istedadlı rəssam təmənnasız olaraq uşaqlarla bərabər SOS kəndindəki evləri əlvan rənglərlə boyayacaq, ərazini uşaqların zövqünü, qonaqlarınsa gözünü oxşayacaq bir məkana çevirəcəklər. Sonda münsiflər heyəti ən gözəl boyanmış 3 evin sakinlərini mükafatlandıracaq.Bundan əlavə, sülh oyunları silsiləsindən mini futbol yarışı da keçiriləcək. Kəndin futbol komandası ətraf ərazidə yaşayan icma komandası ilə oynayacaq, qalib komandaya kubok veriləcək.Bacarıqlı əllər dərnəyinin qızları da, öz əl işlərini sərgiləyəcəklər.
