Millət vəkili Vahid Əhmədov hesab edir ki, uşaqların ehtiyaclarının ödənilməsi və onların sağlam böyümələri üçün həmin müavinətlərin bərpasına ehtiyac var.
AZXEBER.COM bildirir ki, ARB TV-nin "Günə Doğru" verilişində məsələ ilə bağlı maraqlı süjet yayımlanıb.
Vahid Əhmədov - Millət vəkili: "Konkret mənim fikrim ondan ibarətdir ki, ümumiyyətlə, bu vəsait bərpa olunmalıdır. Çünki insanlar müəyyən qədər uşaqlarını böyütmək üçün əziyyət çəkirlər. Ona görə də, bu vəsaiti bərpa etməyə imkan kifayət qədər mümkündür. Azərbaycanın kifayət qədər maliyyə ehtiyatları var".
Sakin: "Elə bilirəm ki, vacibdir. Müəyyən kömək olar. Müəyyən xərcləri ödəyə bilər".
Sakin: "Heç olmasa pampersini, yeməyini alar".
Sakin: "Mən də istəyərəm bərpa olsun. Nə qədər olmaya uşaqların istədiklərini qarşılaya bilərik".
Uşaqpulunun bərpa edilməsi ilə bağlı təkliflər hökumətə təqdim edilib. Təkliflərdə uşaqlar yaş qruplarına görə təsnifləşdirilir və 3 yaşınadək uşaqlara daha çox sosial müavinətin verilməsi göstərilib.
Vüqar Bayramov - İqtisadçı: "3 yaşına qədər uşaqlar üçün biz ayda 80 manat uşaq pulunun verilməsini təklif edirik. 3 yaşdan 6 yaşa qədər aylıq olaraq 50 manat uşaq pulunun verilməsini təklif edirik. Eyni zamanda, 7 yaşdan 17 yaşa qədər, yəni məktəb illərində məktəblilərə ayda 40 manat uşaq pulunun verilməsini təklif edirik".
Ekspertin sözlərinə görə, hazırda ölkəmizdə 17 yaşınadək olan uşaqların sayı 2 mln. 614 min nəfərdir. Əgər bu mexanizm daxilində uşaq pulu bərpa olunarsa, dövlət büdcəsindən il ərzində 1.6 mlrd. manat vəsait ayrılmalıdır. Artıq 3 istiqamətdə vəsaitə qənaət edilməsi və uşaq pulunun verilməsi üçün mənbələr də müəyyənləşib.
Vüqar Bayramov - İqtisadçı: "Ünvanlı sosial yardım proqramının məşğulluq proqramına çevrilməsi nəticəsində yaranan qənaətin bu istiqamətdə yönəldilməsi, 2-cisi özünü maliyyələşdirən rayonların sayının artırılması və gələcəkdə hətta rayonların inzibati vahid olaraq sayının artırılması ilə vəsaitə qənaət edilməsi və uşaq pulunun verilməsi üçün yönəldilməsi və infrastruktur xərclərinə qənaət edilməsi və bu istiqamətdə yönəldilməsinin təmin olunması".
Məsələ parlamentin diqqətindədir. Əmək və sosial siyasət komitəsinin sədri Hadı Rəcəbli bildirib ki, hazırda ölkə başçısının tapşırığı ilə 3 yaşına qədər uşaqlara görə verilən müavinətin artırılması məsələsinə baxılır.
Hadı Rəcəbli - Millət vəkili: "Möhtərəm prezidentimizin tapşırığı var. Yenə də həmin qrup, 3 yaşa qədər uşaqların müavinət məsələsinə yenidən baxılma ideyası var. Eyni zamanda, digər məsələlər var ki, uşaqlarla bağlı o məsələlərə baxılacaq".
Uşaqpulu ilə bağlı məsələnin Milli Məclisin komitə iclaslarında müzakirəsindən sonra plenar iclasda gündəliyə daxil edilməsi gözlənilir.
