Türkiyədən Ermənistana birbaşa aviareyslər açıla bilər. Türkiyənin Van şəhərində yaradılan "Van Way Airlines” şirkəti bir sıra qonşu ölkələrlə yanaşı İrəvana hava reysləri təşkil etməyi planlaşdırır. Ermənistana təyyarə reysi açmaq istəyən ilk türk şirkətinin rəsmisi İsa Sayırın məlumatına görə, hazırda Xarici İşlər Nazirliyi və bir sıra qurumlarla bu barədə danışıqlar aparılır və icazə alındığı halda tezliklə Ermənistana uçuşlar həyata keçiriləcək. Şirkət rəsmisinin sözlərinə görə, bu yalnız kommersiya məqsədi daşıyır.

“Biz aviaşirkət olaraq iş görmək istəyirik. Məqsədimiz Vandan Türkiyəyə ən yaxın olan İraq və İrana uçmaqdır. Bizim əsl niyyətimiz budur. Amma bir gün sərhədlər açılarsa, çox yaxşı bir müştəri, potensial olar. Bilirsiniz ki, Türkiyədən Ermənistana böyük etiraz var, amma bizə bu icazəni verərlərsə, iş görə biləriksə, İnşallah o tərəflərə səfər etməyi düşünürük. Amma hazırda təəssüf ki, bu, mümkün deyil”.

Türkiyə Xarici İşlər Nazirliyindən isə bildirilib ki, "Van Way Airlines” sadəcə turizm operatorudur və nazirliyə həmin şirkət tərəfindən Ermənistana hər hansı bir aviareysin açılması barədə müraciət daxil olmayıb.