Prezident İlham Əliyevin Yeni Azərbaycan Partiyasının qurultayında minimum əməkhaqqının, pensiyaların və sosial müavinətlərin artırılacağını bəyan etməsi növbəti ildən etibarən minimum əməkhaqqı məsələsinə hər il baxılacağı anlamına gəlir”
Bu sözləri Milli Məclisin deputatı Vüqar Bayramov AZXEBER.COM-a açıqlamasında deyib.
Deputat qeyd edib ki, bu, növbəti ildə altıncı sosial paketin reallaşacağı anlamına gəlir:
"Azərbaycan Prezidenti Yeni Azərbaycan Partiyasının qurultayında minimum əməkhaqqının, pensiyaların və sosial müavinətlərin artırılacağını bəyan etdi. Prezident bununla bağlı göstərişlərin verildiyini də bildirdi. Nəzərə alaq ki, bu addımlar növbəti sosial paketin icrası anlamına gəlir. Prezidentin qeyd etdiyi kimi, məqsəd vətəndaşların sosial təminatını daha da gücləndirməkdir. Bu istiqamətdə büdcə ayırmalarının artırılması prioritet olaraq qalır.
Bu, növbəti ildə altıncı sosial paketin reallaşacağı anlamına gəlir. 2027-ci ilin dövlət büdcəsində də bu artımların nəzərdə tutulub. Növbəti ilin büdcə xərclərinin 44 faizi sosial istiqamətə yönəldiləcək. Bu isə 18,5 milyard manat vəsaitin həmin sahəyə ayrılması deməkdir. Beləliklə, sosial proqramlara daha çox vəsait ayrılması deməkdir”.
Parlamentari qeyd edib ki, minimum əməkhaqqındakı artımlar artıq mütəmadi xarakter alır:
"Minimum əməkhaqqındakı artımların da artıq mütəmadi xarakter aldığını nəzərə almalıyıq. Çünki Prezident tərəfindən imzalanan qanunvericilik dəyişikliklərinə əsasən, Azərbaycanda minimum əməkhaqqının artırılması mütəmadi şəkildə həyata keçirilir. Bu, eyni zamanda, növbəti ildən etibarən minimum əməkhaqqı məsələsinə hər il baxılacağı anlamına gəlir. Pensiyaların indeksləşdirilməsi də 2027-ci ilin yanvarından etibarən reallaşacaq. Bu, 1 milyon 100 min vətəndaşı əhatə edəcək. Əmək pensiyalarının indeksləşdirilməsi bütün növ pensiyalar üzrə yeni artımlar deməkdir və əmək pensiyası alan vətəndaşlarımızı əhatə edəcək”.
"Sosial müavinətlərin də artırılması nəzərdə tutulur. Beləliklə, növbəti il yalnız əməkhaqqı və pensiyalar deyil, müavinətlər də artırılacaq. Bu, daha geniş miqyaslı sosial təminat tədbirlərinin həyata keçiriləcəyindən xəbər verir”,-deyə deputat bildirib.
Şahanə Ziyad
