Amerikalı diplomatlar İrana 100 tank əleyhinə raketin və Bolqarıstan istehsalı olan avtomatların satışına görə Ermənistan müdafiə naziri Seyran Ohanyana etirazlarını bildiriblər. Bu barədə WikiLeaks saytı məlumat verib.
Belə ki, 2008-ci il, 17 iyun tarixli məktubda ABŞ-ın Ermənistandakı səfiri bu barədə o zamankı dövlət katibi Kondoliza Raysa məlumat verib. WikiLeaks-in məlumatına görə, 2008-ci ildə İraq şiələrində olan həmin silahların gətirilməsi marşrutunu aydınlaşdırmaq məqsədi ilə K.Rays Ermənistandakı səfir Mari Yovanoviçə müvafiq tapşırıq da verib. ABŞ-ın İrəvandakı səfirliyinin əməkdaşlarının yığdığı məlumatlar ABŞ Dövlət Departamentinə ötürülüb. Məlumatlara əsasən, İraq şiələrindən müsadirə olunan Bolqarıstan istehsalı olan raket və avtomatları Bolqarıstan Ermənistana, sonuncusu isə öz növbəsində İrana satıb, Tehran isə İraq şiələrinə göndərib. Depeşaya görə, rəsmi İrəvan bu məsələni qəti şəkildə inkar etsə də amerikalı diplomatlar müdafiə naziri Seyran Ohanyana bildiriblər ki, İraqda müsadirə olunan bolqar avtomatlarının seriya nömrələri Bolqarıstan-Ermənistan silah kontraktında olan seriya nömrələri ilə üst-üstə düşür: “Bundan sonra müdafiə naziri deyilənlərlə razılaşıb”. Məktubda o da bildirilir ki, ABŞ diplomatları İrana silah satışının dayandırılmayacağı təqdirdə İrəvana qarşı sanksiyaların tətbiq olunacağını da dövlət katibinin adından bildiriblər.
Yeni Müsavat
