Ermənistanda çəkildiyi bildirilən videoda küçə musiqiçilərinin Azərbaycan bəstəkarı Üzeyir Hacıbəylinin məşhur "Arşın mal alan" operettasından bir parçanı ifa etdiyi görünür.
Diqqət çəkən məqam isə videonun üzərində həmin musiqinin "Ermənistanın milli musiqisi" kimi təqdim edilməsidir. Bu isə sosial şəbəkə istifadəçilərinin etirazına səbəb olub. "Arşın mal alan" 1913-cü ildə Üzeyir Hacıbəyli tərəfindən yazılıb və Azərbaycan musiqi mədəniyyətinin ən tanınmış əsərlərindən biridir.
Xalq artisti Yalçın Adıgözəlov AZXEBER.COM-a açıqlamasında bildirib ki, Azərbaycan musiqi irsinin mənimsənilməsi cəhdləri uzun illərdir müşahidə olunur:
"100 ildən çoxdur ki, ermənilər "Arşın mal alan”ın onlara məxsus olduğunu iddia edirlər. Lakin tarixi faktlar bu iddiaları təsdiqləmir. Müxtəlif dövrlərdə Fikrət Əmirov, Səid Rüstəmov və Vasif Adıgözəlov kimi Azərbaycan bəstəkarlarının əsərləri ilə bağlı da oxşar iddialar səsləndirilib”.
Y. Adıgözəlov qeyd edib ki, Azərbaycan və erməni xalqları uzun illər qonşuluq şəraitində yaşayıblar:
"Ermənilər bizə ən yaxın xalqlardan biri hesab olunur. Tarix boyu mətbəx, adət-ənənə, musiqi və rəqs nümunələri ilə bağlı müxtəlif mübahisələr olub. Gürcülərlə də qonşuyuq, lakin onların özünəməxsus mədəni irsi aydın şəkildə formalaşıb”.
Xalq artisti həmçinin erməni bəstəkarı Aram Xaçaturyanın Üzeyir Hacıbəylinin yaradıcılığına verdiyi yüksək qiyməti xatırladıb:
"Aram Xaçaturyan dəfələrlə qeyd edib ki, Üzeyir Hacıbəylinin əsərləri və nəzəri irsi onun formalaşmasında mühüm rol oynayıb. O, bunu açıq şəkildə etiraf edir və Üzeyir bəyin yaradıcılığına böyük hörmətlə yanaşırdı”.
Şahanə Ziyad
