Dövlət Su Ehtiyatlarına Nəzarət Xidmətinin hesablamalarına görə, son 5 ildə dənizin səviyyəsi təxminən 1 metr, son 10 ildə 1,5 metr, son 30 ildə isə 2,5 metr azalıb. Hazırda illik enmə tempi 20-30 santimetr təşkil edir.
AZXEBER.COM-un Xezerxeber.az-a istinadən məlumatına görə, ekoloq Rövşən Abbasov deyir ki, Xəzər dənizində suyun səviyyəsinin enməsi prosesi davamlı hal almayıb. Yəni proses fasilələrlə gedir.
Onun sözlərinə görə, illər əvvəl də eyni hal təkrarlanmışdı - bir müddət suyun səviyyəsi enirdi, sonradan isə qalxmağa başladı.
Qazaxıstanın Ekologiya Nazirliyinin uzunmüddətli proqnozlarına əsasən, optimist ssenaridə 2030-cu ilə qədər Xəzərin səviyyəsinin mənfi 29,8 metrə, 2050-ci ilə qədər isə mənfi 32,4 metrə enəcəyi gözlənilir. Pessimist ssenaridə isə bu göstəricinin 2050-ci ildə mənfi 34 metrə qədər azalacağı ehtimal edilir. Ancaq ekoloqlar hesab edirlər ki, belə proqnozlar təcrübədə özünü doğurtlmayıb.
Mütəxəssislər bildirirlər ki, Xəzərin səviyyəsindəki dəyişikliklər təkcə sahilboyu ərazilərə deyil, limanların fəaliyyətinə, balıqçılığa, biomüxtəlifliyə və regionun iqtisadiyyatına da təsir göstərir. Buna görə də dəyişən şəraitə uyğunlaşma tədbirlərinin hazırlanması və su ehtiyatlarının səmərəli idarə olunması əsas prioritetlərdən biri hesab edilir.
