Xəbər verdiyimiz kimi, Bakının Sabunçu rayonunda 74 yaşlı Sevda Əkbər qızı Nəbiyeva və Biləsuvarın Xırmandalı kəndində isə 2026-cı il təvəllüdlü Raul Vüqar oğlu Abdullazadənin nəfəs borusunda qida qalıb. Onların hər ikisi xəstəxanaya aparılarkən yolda ölüblər.
İki nəfərin qidanın nəfəs borusuna düşməsi nəticəsində həyatını itirməsi boğulma hallarında vaxtında və düzgün ilkin tibbi yardımın əhəmiyyətini yenidən gündəmə gətirib.
Bəs yeməkdən boğulan şəxsə hansı ilkin tibbi yardım göstərilməlidir?
Tibbi ekspert Rasif Bağırov AZXEBER.COM-a açıqlamasında deyib ki, belə hallarda adətən Heimlix manevri (Heimlich) deyilən üsul tətbiq olunur:
"Belə hallarda adətən Heimlix manevri (Heimlich) deyilən üsul tətbiq olunur. Bu üsul əsasən böyüklərə şamil edilir. Belə vəziyyət yarananda xəstənin arxasında dayanılır, qarının yuxarı hissəsindən tutulur və kəskin şəkildə sıxılır. Bu bir neçə dəfə təkrarlanır. Döş qəfəsi və diafraqma aşağıdan yuxarı sıxıldığı üçün tənəffüs yoluna düşmüş qida və ya yad cisim ağız boşluğuna çıxır, tənəffüs yolu açılır və xəstə yenidən nəfəs almağa başlayır”.
O qeyd edib ki, azyaşlı uşaqlarda isə vəziyyət fərqlidir:
"Azyaşlı uşaqlarda isə vəziyyət fərqlidir. Yeni doğulmuş və körpə uşaqlara bu üsul eyni qaydada tətbiq edilmir. Uşağa yemək verən ana, dayə və ya digər şəxs məsuliyyət daşımalıdır ki, bu cür hal baş verməsin. Ağıza düşən kiçik bərk cisim və ya qida tənəffüs yoluna keçərək boğulmaya səbəb ola bilər. İlkin yardım zamanı uşağın həm kürək nahiyəsinə, həm də mədə hissəsinə yaşına uyğun şəkildə müdaxilə edilir. Bu zaman tənəffüs yolunda qalan qida və ya yad cismin xaric olması təmin edilir”.
"Bu, təcili tibbi yardım gələnədək göstərilən ilkin yardımdır. Əgər bu müdaxilə nəticə verməzsə, xəstə hadisə yerində həyatını itirə bilər.
Yəni ilkin yardım dedikdə söhbət məhz Heimlix manevrindən gedir. Bu üsullar düzgün icra edildikdə, əksər hallarda xəstənin həyatını xilas etmək mümkün olur”,- deyə ekspert bildirib.
Şahanə Ziyad
