Zəhərli insanlarla ünsiyyətdə ən güclü mövqe mübahisədə qalib gəlmək deyil, öz davranışınıza nəzarəti qorumaqdır. Zəhərli insan hər zaman açıq şəkildə münaqişə yaratmır. Bəzən bir neçə xoşagəlməz söz, nümayişkaranə baxış və ya sizi incitmək cəhdi kifayət edir ki, əsəbiləşəsiniz, özünüzü müdafiə etməyə başlayasınız və ya özünüzdən şübhələnəsiniz. Lakin aqressiya ilə cavab vermək məcburi deyil.
Mütəxəssislər mübahisə etmədən və artıq söz demədən də zəhərli insanı yerində oturtmağa kömək edən psixoloji üsullar varlığını bildirirlər. Bir çox vəziyyətdə davranışınız uzun izahlardan daha çox şey deyir.
Sakit şəkildə gözlərinə baxın
Kimsə sizi təxribata çəkməyə çalışdıqda dərhal baxışınızı yayındırmağa və ya əsəbi şəkildə gülümsəməyə ehtiyac yoxdur. Bir neçə saniyə sakit şəkildə göz təmasını qoruyun, sonra isə öz işinizlə məşğul olmağa davam edin.
Bunu baxış yarışına çevirmək vacib deyil. Məqsəd qarşınızdakı insanı qorxutmaq yox, özünüzə inamlı olduğunuzu və təxribatdan çəkinmədiyinizi göstərməkdir.
Dik duruşunuzu qoruyun
Zəhərli insanla ünsiyyət zamanı bədən dili sözlərdən daha çox məna verə bilər. Özünüzü sıxmayın, tələsməyin, əllərinizi əsəbi şəkildə sıxmayın və mümkün qədər az yer tutmağa çalışmayın.
Dik bel, açıq çiyinlər, sakit hərəkətlər və normal danışıq tempi daxili əminlik və özünənəzarət təsiri yaradır.
Daxilən narahat olsanız belə, təxribat edən şəxsin davranışınızı idarə etməsinə imkan verməyin.
Dərhal reaksiya vermək əvəzinə fasilə edin
Manipulyatora qarşı dayanmağın sadə üsullarından biri avtomatik reaksiya verməməkdir. Əgər deyilən sözlər sizi incitdisə, cavab verməyə tələsməyin.
Qısa fasilə edin, nəfəs alın və yalnız bundan sonra söhbəti davam etdirməyin lazım olub-olmadığına qərar verin.
Bu üsul qarşınızdakı insanın sizi qəsdən əsəbiləşdirməyə və ya özünüzü müdafiə etməyə məcbur etməyə çalışdığı emosional tələyə düşməməyə kömək edir.
Üz ifadənizi neytral saxlayın
Zəhərli insan sizin reaksiyanızı diqqətlə izləyə bilər: incidinizmi, qorxdunuzmu, əsəbiləşdinizmi və ya gərginləşdinizmi.
Buna görə təxribatlara qarşı digər psixoloji üsul artıq emosional siqnallar verməməkdir. Sakit üz ifadəsi, sabit səs tonu və əsəbi gülümsəmənin olmaması göstərir ki, emosiyalarınız vasitəsilə sizi idarə etmək o qədər də asan deyil.
Bu, hisslərinizi gizlətmək demək deyil. Söhbət başqa insanın təzyiqi altında hərəkət etmək əvəzinə, reaksiyanızı özünüzün seçməsindən gedir.
Sadəcə ünsiyyəti dayandırın
Bəzən zəhərli insanı söz demədən yerində oturtmağın ən yaxşı yolu onun qaydaları ilə oynamağa davam etməməkdir.
Əgər qarşınızdakı şəxs şəxsi sərhədlərinizi aşırsa, söhbəti dayandıra, diqqətinizi başqa işə yönəldə və ya sadəcə uzaqlaşa bilərsiniz. Hər təxribatı cavablandırmaq, hər təhqirə münasibət bildirmək məcburiyyətində deyilsiniz.
Münaqişəyə girməkdən imtina etməyiniz zəiflik deyil. Əksinə, bu, başqa insanın sizi istədiyi kimi davranmağa məcbur edə bilmədiyini göstərməyin yollarından biridir.
///lent.az///
