Ukrayna Prezidenti Volodimir Zelenski Ukraynadakı münaqişənin nizamlanması ilə bağlı Rusiya ilə telefon danışığı aparmaqdan imtina edib.
AZXEBER.COM oxu.az-a istinadən xəbər verir ki, o, bu barədə Almaniya kansleri Fridrix Merts ilə birgə keçirdiyi mətbuat konfransında bildirib.
"Telefon danışığından söhbət gedirsə, Rusiya bundan bir daha görüş keçirməmək üçün istifadə edəcək", - deyə Zelenski qeyd edib.
Zelenski telefon danışıqlarını "perspektivsiz" hesab etdiyini bildirib. O, danışıqlar aparmaq üçün Moskvaya səfər etməkdən də imtina edib.
"Heç kim Moskvaya səfəri dəstəkləməyəcək", - deyə Ukrayna prezidenti vurğulayıb.
Daha əvvəl Rusiya prezidentinin köməkçisi Yuri Uşakov "Vesti" telekanalının jurnalisti Pavel Zarubinə açıqlamasında Vladimir Putinin Zelenski ilə danışıqlardan heç vaxt imtina etmədiyini bildirmişdi.
Uşakov bu fikirləri Zelenskinin zəng edəcəyi təqdirdə Putinin onun zənginə cavab verib-verməyəcəyi ilə bağlı suala cavab olaraq səsləndirmişdi.
