Tələbə Qəbulu üzrə Dövlət Komissiyası (TQDK) iyunun 29-də respublikanın bir sıra şəhər və rayonlarında, o cümlədən Lənkəran, Astara, Masallı, Lerik, Yardımlı, Cəlilabad, Şirvan, Salyan, Neftçala, Hacıqabul və Biləsuvarda orta ümumtəhsil müəssisələrinin XI və IX sinif şagirdləri üçün mərkəzləşdirilmiş buraxılış imtahanları keçirib. TQDK-nın mətbuat xidmətindən AZXEBER.COM-a verilən məlumata görə, hər bir rayon üzrə saat 10:00-da XI siniflər, həmin gün saat 15:00- da isə IX siniflər imtahan veriblər.Tələbə Qəbulu üzrə Dövlət Komissiyasının (TQDK) sədri Məleykə Abbaszadə Salyan, Lənkəran, Astara, Lerik və Masallı rayonlarındakı imtahan mərkəzlərinə baş çəkib, buraxılış imtahanlarının gedişini izləyib.Bütün binalarda imtahan nəzərdə tutulduğu kimi təlimata uyğun şəkildə keçirilmişdir.İlkin məlumatlara əsasən müxtəlif binalarda 14 şagird müxtəlif qayda pozuntularına yol verdiklərinə, o cümlədən başqasının yerinə imtahana girmə, mobil telefonla imtahan binasına keçməyə cəhd, imtahanın gedişinə mane olma və köçürməyə cəhd etdiklərinə görə imtahandan xaric edilib və nəticələri ləğv olunub.
