Dövlət idarəçiliyində kadr dəyişiklikləri 2026-cı ildə də diqqət mərkəzində olub. İl ərzində müxtəlif dövlət qurumlarında rəhbər heyətin yenilənməsi davam edib, bir sıra yüksək vəzifəli şəxslər tutduqları vəzifələrlə vidalaşıblar. Dəyişikliklərin bir hissəsi yeni təyinatlar və struktur islahatları ilə əlaqələndirilsə də, bəzi hallarda səbəb kimi şəxsi istək, yaş həddi, səhhət və ya səlahiyyət müddətinin başa çatması göstərilib.
AZXEBER.COM 2026-cı ildə vəzifəsindən azad edilən əsas vəzifəli şəxslərin siyahısını təqdim edir:
Məhəmməd Paşazadə – "Azərbaycan Xəzər Dəniz Gəmiçiliyi" (ASCO) QSC-də sədrin müşaviri vəzifəsindən azad olunub. ASCO onun öz ərizəsi ilə işdən ayrıldığını açıqlayıb.
Vüqar Qurbanov – TƏBİB-in Müşahidə Şurasının qərarı ilə icraçı direktor vəzifəsindən azad edilib. Onun səlahiyyətləri müvəqqəti olaraq icraçı direktorun müavini Anar İsrafilova həvalə olunub.
TƏBİB-də geniş kadr islahatı – Struktur dəyişiklikləri çərçivəsində İnsan resursları departamentinin rəhbəri Emin Xasıyev, İnzibati idarəetmə departamentinin rəhbəri Vasif Səfərov, Beynəlxalq əlaqələr departamentinin rəhbəri Fidan Mahmudova, İlkin səhiyyə xidməti departamentinin rəhbəri Rəşad Çobanlı, eləcə də bir sıra şöbə müdirləri və məsləhətçilər vəzifələrindən azad ediliblər. Qərarlar yeni icraçı direktor Anar Bayramovun rəhbərliyi dövründə həyata keçirilən struktur islahatları çərçivəsində qəbul olunub.
Müşfiq Məmmədov – Müdafiə Nazirliyinin Şəxsi Heyət Baş İdarəsinin rəisi, general-mayor Müşfiq Məmmədov vəzifəsindən azad olunub. Nazirliyin məlumatına görə, o, səhhətində yaranan problemlərlə əlaqədar öz arzusu ilə ehtiyata buraxılıb.
Zaur İbrahimov – Sosial Xidmətlər Agentliyi İdarə Heyəti sədrinin müavini nazirin əmri ilə öz ərizəsi əsasında vəzifəsindən azad edilib
Balabəy Balabəyov – Siyəzən Rayon İcra Hakimiyyəti başçısının köməkçisi yaş həddinə çatdığı üçün təqaüdə göndərilib və vəzifəsindən azad olunub
Tovuz Rayon İcra Hakimiyyəti – Rayon İcra Hakimiyyətində aparılan struktur islahatları nəticəsində 43 əməkdaşın dövlət qulluğuna xitam verilib. Müvafiq qərar rayon icra hakimiyyətinin başçısının sərəncamı ilə qəbul olunub.
