Türkiyə 23 Aprel tarixini Milli Suverenlik və Uşaq Bayramı kimi qeyd edib.
AZXEBER.COM Türkiyə mətbuatına istinadən xəbər verir ki, bu əlamətdar günün tarixi 1920-ci ilə – Türkiyə Böyük Millət Məclisinin qurulduğu günə əsaslanır. Həmin gün, millətin iradəsini təmsil edən yeni bir dövrün başlanğıcı olub.
Mustafa Kemal Atatürk, bu tarixi günü gələcəyin təminatı olan uşaqlara həsr edib. O, milli suverenliyin xalqın iradəsi ilə qurulmasının sevincini uşaqlarla bölüşərək, bu günü həm milli, həm də mənəvi bir bayrama çevirib. Beləliklə, 23 Aprel dünyada uşaqlara ithaf olunan ilk və yeganə rəsmi bayram statusunu qazanıb.
Bayram münasibətilə ölkə daxilində müxtəlif tədbirlər keçirilib, məktəblərdə şeirlər söylənib, rəqs və musiqi proqramları təqdim olunub. Türkiyə, ənənəyə uyğun olaraq, dünyanın müxtəlif ölkələrindən uşaqları qonaq edib və beynəlxalq dostluq ruhunu yaşadıb.
23 Aprel həm milli iradənin təntənəsi, həm də gələcəyin ümidi olan uşaqlara verilən dəyərin göstəricisi kimi tarixdə öz yerini qoruyub.
Oksana
