Təhsil Nazirliyinin orta məktəblərdə hicab məsələsində mövqeyinin yumşalması xəbərləri təsdiqlənmir. Qurumun mətbuat xidmətinin rəhbəri Bayram Hüseynzadə açıqlamasında deyib ki, Təhsil Nazirliyinin mövqeyində heç bir dəyişiklik olmayıb: “Mətbuatda, informasiya saytlarında dərc olunan xəbərlər yanlışdır. Yanvarın 9-da özəl kanallardan birində cənab nazir özü də çıxış edərək bildirdi ki, əvvəlki mövqedədir. Sadəcə, müxbir sual edəndə ki, dərsə gələ bilməyən hicablı şagirdlər nə etməlidir, nazir belə cavab verib: “Onlar məktəb direktoruna yaxınlaşmalı və direktor onlara təhsilin nə qədər vacib olduğunu, problemin həllini başa salmalıdır”. Montaj zamanı “direktor onlara təhsilin nə qədər vacib olduğunu, problemin həllini başa salmalıdır” hissəsi çıxarılıb. Sonuncu hissəni veriblər ki, hicablı şagirdlər valideynləri ilə bərabər məktəb direktorlarına yaxınlaşmalıdırlar. Bunu isə ictimaiyyət yanlış başa düşüb. Nazirin sözləri guya nazirliyin mövqeyinin yumşalması kimi qələmə verilib.
Hicablı məktəblilərlə bağlı nə Təhsil Nazirliyinin, nə də dövlətin mövqeyində dəyişiklik var. Həmin mövqedir. Heç nə dəyişməyib. Heç dəyişməsi də mümkün deyil. Nazirlik hər zaman qeyd edib ki, məktəb direktorları hicablı şagirdlərlə iş aparmalı, onlara düzgün yolu başa salmalıdır ki, tədrislərini davam etdirsinlər”.
Qurum rəsmisi hicab probleminin ölkə üzrə az sayda şagirdin davamiyyətinə təsir göstərdiyini deyib: “Belə şagirdlərin sayı o qədər də çox deyil. Apardığımız təbliğati işlər, direktorların şagirdlərlə, valideynlərlə söhbəti artıq öz nəticəsini verib. Konkret bir rəqəm deməkdə çətinlik çəkirəm. Bu rəqəmlər də tez-tez dəyişir. Məktəbə hicabla gəlmək istəyən az şagird qalıb. Gözləyirik ki, yaxın vaxtlarda bu məsələ tamamilə qaydasına düşəcək”.
Bayram Hüseynzadə bölgələrə nisbətən paytaxt Bakının bəzi kəndlərində şagirdlərin hicabla orta məktəbə gəlməsi probleminin radikal olduğunu deyib: “Amma mənə elə gəlir ki, ümumilikdə bu elə də ciddi problem deyil”. //"Mediaforum"
