Bu barədə açıqlama verən politoloq Cümşüd Nuriyev deyib ki, Metyu Brayza Azərbaycana xüsusi şparqalka ilə gəlib: “Amma orada hələ nə yazıldığını biz bilmirik. Eyni zamanda bütün hallarda səfirlər öz ölkələrindən aldıqları təlimatlarla işləyirlər. Nəzər alsaq ki, yeni səfir ABŞ-ın xüsusi kəşfiyyat orqanlarında kurs keçən bir adamdır. 1999-cu ildən artıq bu sistemdədir. Ondan əvvəl də həmin məsələlərlə məşğuldur. Yaxın Orta Şərq, MDB ölkələri üzrə mütəxəssis kimi hazırlanıb. Bütün bunları götürsək, o, Azərbaycana heç də xeyir iş üçün gəlməyib. Yəni biz açıq deyək ki, ABŞ-ın Azərbaycandakı səfirlərinin hamısı dövlətin daxili işlərinə qarışıb. M. Brayza isə Azərbaycan iqtidarına yaxın yox, onu daha çox şantaj etməklə məşğul olan adam olacağına inanıram. Bunu mən məsuliyyətimlə deyirəm. Çünki ABŞ-ın Azərbaycana təyin etdiyi səfirlər içərisində ən professionallardan biridir. O, Azərbaycanda işləyib və Azərbaycan mühitini yaxşı tanıyır”.
Metyu Brayzanın Azərbaycana gəlməsi ilə bağlı erməni diasporunun etirazlarına gəlincə C. Nuriyev vurğulayıb ki, bunlar bütünlüklə Ermənistan dövlətinin daxilinə hesablanan addımlardır. Politoloq eyni zamanda ABŞ-ın siyasi gedişlərində ikili standartların hələ də mövcud olduğunu deyib: “Birləşmiş Ştatların ölkəmizə səfir təyin etməməklə bir vaxtlar Rusiyanın Azərbaycana qarşı istifadə etdiyi siyasi gedişdən istifadə etdi. Amma Azərbaycan dövlətinin mövqeyini görəndən sonra bu addımı atdı. Nədən Obama öz əmrini əvvəldən göndərmirdi? Bunların hamısı ABŞ tərəfindən uzun müddət sınaqdan çıxarılan gedişlər olduğu hamıya məlumdur. Metyu Brayzanın Azərbaycana gəlməsi ilə bağlı ermənilərin hay-küy salması onların Türkiyə və Azərbaycana həmişə səfir təyin olunan da sınaqdan keçirdikləri üsullardan biridir. Daha çox bu Ermənistan hakimiyyətində olan şəxslərin keçirdiyi bir təbliğatdır ki, gələni həm qorxutsunlar, eyni zamanda ölkədaxilinə hesablanan bir gedişdir. Biz nə Ermənistan nə də, Afrika ölkələri deyilik. Azərbaycanda intellekt səviyyələri yüksək olan insanlar çoxdur. ABŞ-ın bölgədə hansı siyasət yürütdüyünü də çox gözəl bilirik. ABŞ Azərbaycan ərazi bütövlüyünü dəstəkləyən bir dövlət olsaydı, Dağlıq Qarabağ və Ermənistana ikiqat ayrıca maddi yardım ayırmazdı, Azərbaycan iqtidarını şantaj etməzdi”./// SIA
