Ağasəlim Mircavadov: “Qrupda 7 xal qazanmaq uğur deyil”
İDMAN
14:33 07.09.2011
1658
“Yeddi xal qazanmaq uğur deyil”. Bu sözləri Azərbaycanın əməkdar məşqçisi Ağasəlim Mircavadov deyib. Millimizin dünən Qazaxıstan seçməsi üzərində qələbəsini dəyərləndirən mütəxəssis rəqibi fərdi oyun hesabına məğlub etdiyimizi bildirib:“İkinci hissədə vurulan qollar göstərdi ki, bu oyunu biz istəyirik. Düzdür, hələlik bizdə komanda oyunu o dərəcədə deyil. Bir az da işləmək lazımdır. Orta xətdə ağıllı, kamil futbolçular olmalıdır ki, hücumları təşkil etsinlər. Onda bizim hücumçulara da çox asan olar. Dünən də biz fərdi oyun hesabına rəqibi məğlub etdik”.Dünənki qarşılaşmada Rauf Əliyevlə Vaqif Cavadovun oyununu fərqləndirən Mircavadov sonuncunun xüsusilə qeyd edib:“Vaqif və Raufun istəyi bizi qələbəyə daşıdı. Bu futbolçular mən deyərdim ki, ən yaxşı oyunlarını oynadılar. Vaqifin oyununu xüsusilə vurğulamaq istərdim. Şərt o deyil, bu futbolçu qol vurdu. O, həm də qolların vurulmasında yaxından iştirak etdi. Bir hücumçu kimi əlindən gələni edirdi. Biz hər bir futbolçudan belə oyun gözləyirdik”.Qazanılan qələbə və tariximizdə ilk dəfə seçmə mərhələdə 7 xal yığmamıza baxmayaraq, təcrübəli çalışdırıcı bunu uğur saymır:“Mən seçmə mərhələdə yeddi xal toplamağı uğur saymıram. Mənim üçün uğur odur ki, Azərbaycan Avropa və dünya çempionatının qrup mərhələsinə düşsün. Biz bu gün 7 xal qazanmışıq, gələn il 8 xal həddini aşaq. Bununla uğur əldə edə bilməyəcəyik. Biz xal hesabını artırmağı yox, qrup mərhələsinə düşməyi fikirləşməliyik. Avstriyanı da evdə udub, 10 xal yığa bilərik. Ancaq bu yetərli deyil. Makedoniya bir seçmə mərhələdə 13-14 xal topladı. Bəlkə də indi qrup mərhələsindən danışmaq tez olar. Ancaq ən azından istək olmalıdır”.
