AFFA-nın baş katibi: “Kim nə deyir, desin, millimiz tarixi nəticə qazandı”
İDMAN
10:13 12.10.2011
1581
“Komandamız səfərdə oynasa da, fikrimcə, əzmkarlıq göstərdi. Normal, yaxşı oyun göstərdi”.AZXEBER.COM-un məlumatına görə, bu sözləri Lent.az saytının İstanbula ezam olunan əməkdaşına açıqlamasında AFFA-nın baş katibi Elxan Məmmədov deyib. Milli komandamız Avro-2012-nin seçmə qrup mərhələsində sonuncu matçına çıxdı. “Türk Telekom Arena”da Türkiyə yığmasına 0:1 hesabı ilə uduzduğumuz qarşılaşmadan sonra Məmmədov oyunla bağlı fikirlərini açıqlayıb. “Türkiyə millisinə 3 xal mütləq lazım idi. Bu, qələbə onlara həyat qədər vacib idi. Onlar meydanda maksimum güc qoydular. Futbolçularımız isə səfərdə oynamasına baxmayaraq, yaxşı təsir bağışladı. Bu da bizi sevindirir. Amma təbii ki, uduzmaq bizi sevindirmir. Türkiyə yığmasını pley-off mərhələsinə çıxması münasibətilə təbrik edirəm. Məncə belə oyunla Avstriyaya qarşı 11 futbolçu ilə mübarizə aparsaydıq, minimum 1 xal qazana bilərdik”. Baş katib bildirib ki, artıq başa çatmaq olan təsnifat mərhələsində tarixi nəticə qazanıb: “Türkiyə meydana yalnız qələbə üçün çıxmışdı. Rəqib xal itirə bilməzdi, bu səbəbdən 11 nəfərlə hücuma atılmışdı. Səfər sınağı olduğundan, komandamız daha çox yarımmüdafiə və müdafiədə oynayırdı. Kim nə deyirsə, desin, millimiz cari seçmə mərhələdə tarixi nəticə qazandı”. Məmmədov baş məşqçi Berti Foqtsun millimizdəki gələcək taleyi barədə də danışıb: “Qarşıda yoldaşlıq oyunlarımız var. Bundan sonra AFFA rəhbərliyi onunla müqavilənin uzadılıb-uzadılmağı haqda qərar verəcək”.
