Avropa İttifaqının (Aİ) ticarət məsələləri üzrə komissarı Maroş Şefçoviç Fransa prezidenti Emmanuel Makronun Ümumdünya Ticarət Təşkilatının (ÜTT) lazımi qaydada fəaliyyət göstərmədiyi barədə bəyanatını qəbul etməyib.
Bu barədə "Euronews” telekanalı məlumat yayıb.
M.Şefçoviç Aİ-nin təşkilatın qaydalarına sadiq olduğunu vurğulayıb və Makronu bu məsələyə şübhə ilə yanaşmaqda günahlandırıb.
"Biz ÜTT-nin lazımi qaydada fəaliyyət göstərməsinə və dirçəlməsinə sadiqik. Əgər ÜTT dünya ticarət sistemi üçün ən əhəmiyyətli forum olaraq qalmaq istəyirsə, dünya ictimaiyyətinin mövcud ticarət sistemində üzləşdiyi problemləri hamının maraqları naminə həll etməlidir", - o, təşkilatın baş direktoru Nqozi Okonco-İveala ilə görüşdən əvvəl bildirib.
Qeyd edək ki, Makron Parisdə səfirlərlə illik görüşündə beynəlxalq ticarət qaydalarını tənqid edib. Onun sözlərinə görə, ABŞ və Çin bu qaydalara əməl etmir.
