Alıcılar artıq bu avtomobilləri seçir - Səbəb » Azxeber.com Azərbaycanda özəl xəbərlər, araşdırmalar, təhlillər və müsahibələrin tək ünvanı

Alıcılar artıq bu avtomobilləri seçir - Səbəb

SOSİAL

00:37 16.07.2026

195

Son illərdə elektrikli nəqliyyat vasitələrinə qlobal marağın artması avtomobil sənayesində yeni mərhələnin başlanğıcı kimi qəbul edilir. Ekoloji təmizlik, yanacaq qənaəti və müxtəlif dövlət təşviqləri istehlakçıların diqqətini bu istiqamətə yönəldir. Lakin bu dəyişikliklərin ənənəvi daxili yanma mühərrikli nəqliyyat vasitələrinin mövqeyini tamamilə sarsıtdığını demək hələlik tezdir.

Mövzu ilə bağlı Demokrat.az-a açıqlama verən Azərbaycan Avtomobil Dilerləri Assosiasiyasının İdarə Heyətinin sədri Eyyub Əliyev bildirib ki, elektrikli nəqliyyat vasitələrinin benzin və ya dizel mühərrikli maşınların satışına hazırda böyük təsiri yoxdur.

Assosiasiya rəhbəri mövcud vəziyyəti bu cür xarakterizə edib:

"Güzəştlər dönəmində ilk öncə elektrikli avtomobillərə maraq artmışdı, amma sonradan insanlar daha çox hibrid, plug-in hibrid avtomobillərə üstünlük verdilər. Yəni, güzəştlərin bitdiyi indiki dönəmdə elektrikli avtomobillərin benzin avtomobilləri bazarına böyük bir təsiri, ümumiyyətlə, gözlənilmir. Hibrid və plug-in hibridlər ənənəvi avtomobillərlə müqayisədə bazarda fərqlilik yaradır, onların bazar payına təsir edə bilir”.

Eyyub Əliyev həmçinin vurğulayıb ki, tam elektrikli avtomobillər ciddi bazar payı əldə edə bilmir.

Yəni ölkədə vergi və gömrük güzəştlərinin təsiri azaldıqdan sonra alıcılar tam elektrikli modellər əvəzinə həm elektrik, həm də yanacaqla işləyən hibrid variantlara üz tutublar, bu da daxili yanma mühərrikli avtomobillərin hələ uzun müddət bazarda liderliyini qoruyacağını göstərir.