Azərbaycan Respublikasının Prezidenti cənab İlham Əliyevin 21 iyul 2026-cı il tarixində Almaniya Federativ Respublikasına rəsmi səfəri ölkəmizin Avropa istiqamətində həyata keçirdiyi çoxşaxəli xarici siyasətin növbəti mühüm uğuru kimi qiymətləndirilə bilər.
Səfər çərçivəsində keçirilən mətbuat konfransında dövlət başçısı Azərbaycanın Ermənistanla sülh prosesində tutduğu mövqeyə, ölkəmizin ərazi bütövlüyünü və suverenliyini bərpa etməsinə, eləcə də regionda dayanıqlı sülhün təmin olunması istiqamətində atılan addımlara diqqət çəkib.
Prezident İlham Əliyev Almaniya hökumətinin Ermənistanla sülh məsələsindəki rolunu yüksək qiymətləndirərək bildirib:
"Torpaqları uzun illər işğal altında olan Azərbaycan işğala öz gücü ilə son qoydu, ərazi bütövlüyünü bərpa etdi, suverenliyini bərpa etdi. BMT Təhlükəsizlik Şurasının dörd qətnaməsini özü icra etdi, Ermənistana sülh təklif etdi və müsbət cavab aldı. Ona görə yenə də deyirəm, Almaniya hökumətinin də bu sahədə rolunu biz yüksək qiymətləndiririk”.
Dövlət başçısının bu fikirləri Azərbaycanın sülh prosesində nümayiş etdirdiyi prinsipial mövqeyi bir daha ortaya qoyur. Azərbaycan öz ərazi bütövlüyünü və suverenliyini bərpa etdikdən sonra regionda sülh və sabitliyin təmin olunması üçün təşəbbüslərlə çıxış edib.
Almaniyanın sülh danışıqları prosesində, o cümlədən xarici işlər nazirləri səviyyəsində keçirilən görüşlərdə iştirakı bu baxımdan mühüm əhəmiyyət daşıyır. Azərbaycanın Almaniya ilə münasibətlərə verdiyi yüksək qiymət həm ikitərəfli əlaqələrin, həm də Avropa ilə əməkdaşlığın inkişafında qarşılıqlı etimadın mövcudluğunu göstərir.
Prezident İlham Əliyev Azərbaycan-Avropa İttifaqı münasibətlərinə də toxunaraq, Avropa İttifaqı Şurasının Prezidenti Antonio Koştanın və Avropa Komissiyasının Prezidenti Ursula fon der Lyayenin Azərbaycana səfərlərinin böyük siyasi əhəmiyyət daşıdığını vurğulayıb.
Bu səfərlər Azərbaycanla Avropa İttifaqı arasında əlaqələrin daha da gücləndirilməsi baxımından mühüm siyasi mesajdır. Almaniyanın Avropa İttifaqına üzv ölkələr arasında lider mövqeyə malik olması isə onun gələcək əməkdaşlıq prosesində rolunu daha da artırır.
Azərbaycanın xarici siyasətində Avropa istiqaməti mühüm yer tutur. Ölkəmiz həm regional təhlükəsizliyin təmin olunmasında, həm enerji və nəqliyyat layihələrində, həm də siyasi və iqtisadi əməkdaşlıqda etibarlı tərəfdaş kimi çıxış edir.
Bu baxımdan Prezident İlham Əliyevin Almaniyaya səfəri yalnız ikitərəfli münasibətlər baxımından deyil, Azərbaycanın Avropa ilə əlaqələrinin gələcək inkişafı və regionda sülh gündəliyinin təşviqi baxımından da mühüm əhəmiyyət daşıyır.
Müəllif: Aidə Məmmədli
Göygöl rayonu üzrə Təhsil sektorunun məsləhətçisi
