Xəbər verdiyimiz kimi, bu gün Rusiya prezidenti Vladimir Putin İlham Əliyevə zəng edib.
Düşənbədə keçirilən MDB sammitindən sonra Rusiya və Azərbaycan arasında bir sıra aktual ikitərəfli məsələlər müzakirə olunub. Tərəflər ticarət-iqtisadi əlaqələrin inkişafı və enerji, nəqliyyat və logistika sahələrində birgə layihələrin həyata keçirilməsinə sadiqliklərini bir daha təsdiqləyiblər.
Siyasi şərhçi Asif Nərimanlı AZXEBER.COM-a deyib ki, Azərbaycan və Rusiya münasibətlərdə Düşənbə görüşündən sonra böhranın arxada qaldığını görürük:
"Görüşdən əvvəl isə Azərbaycan təyyarəsinin vurulması məsələsi iki tərəfli münasibətlərdə ciddi problemlər yaratmışdı. Vəziyyətin bu həddə çatmasının əsas günahkarı Rusiya idi. Azərbaycanın məqsədi isə Rusiya ilə münasibətləri pisləşdirmək yox, vurulan təyyarə ilə bağlı tələblərin yerinə yetirilməsi, günahkarların cəzalandırılması idi. Düşənbə görüşündə Putin bu məsələləri rəsmi olaraq qəbul etdiyini bildirib. Münasibətlərin bu həddə çatmasında Rusiyada Azərbaycanın qarşı qüvvələrinin də rolu olduğu görünür. Bu vəziyyət Rusiyanın Cənubi Qafqazdakı mövqelərinə ciddi problemlər yaratmışdı”.
Ekspert deyib ki, sözügedən telefon danışığı tərəflər arasında əvvəlki səviyyədə əlaqələrin bərpasına start verib:
"Bu zəngdə iki tərəfli münasibətlər, həm regional, həm də beynəlxalq məsələlər müzakirə olunub. Rusiya üçün əsas məqsəd, təyyarə böhranından sonra yüksək səviyyədə əlaqələri bərpa etmək, həmçinin Cənubi Qafqazdakı mövqelərini gücləndirməkdir. Ukrayna müharibəsindən və AZAL-ın təyyarəsinin vurulmasından sonra bölgədə Rusiyanın mövqeləri zəifləyib. Rusiya regionda kommunikasiyaların açılmasında iştirakını təmin etməyə çalışır. Rusiya əvvəllər Cənubi Qafqazı öz nəzarəti altında saxlamaq niyyətində idi, lakin Vaşinqton razılaşması bu imkanları məhdudlaşdırdı. Buna baxmayaraq, Rusiya reallıqlar çərçivəsində mövqelərini gücləndirmək və Şimal-Cənub nəqliyyat dəhlizində iştirak imkanlarını artırmaq istəyir. Bu, həm yeni bazarlara çıxmaq, həm də siyasi və iqtisadi müttəfiqlər qurmaq baxımından vacibdir. Bu nəqliyyat dəhlizi təbii olaraq Azərbaycandan keçir”.
A.Nərimanlı qeyd edib ki, Azərbaycan-Rusiya münasibətləri normallaşma mərhələsinə keçib:
"Azərbaycan-Rusiya münasibətləri normallaşma mərhələsinə keçib və bundan sonra ciddi problemlərin yaranacağı gözlənilmir. Rusiya Azərbaycana ehtiyatlı yanaşacaq və bu siyasət çərçivəsində münasibətləri davam etdirəcək”.
Şahanə Ziyad
