Bir neçə gün əvvəl ölkə başçısı Azərbaycan Texniki Universitetinin (ATU) təmir-bərpası üçün Prezidentin Ehtiyyat Fondundan ilkin olaraq 3.5 milyon manat ayırıb. Xatırladaq ki, 2006-2011-ci illər ərzində ATU binasının təmir üçün dövlət büdcəsinin investisiya xərclərindən 7 milyon manat ayrılmışdı. 2012-ci ildə ilkin olaraq bu istiqamətdə hər hansı bir vəsaitin ayrılmadığı göstərilsə də, ilin son ayında PEF-dən bu ayırma şübhə doğurur.
Sözügedən ali məktəbə yollanıb 5 ildə (2006-2011-ci illər) görülən təmir və bərpa işi ilə maraqlandım. ATU-nda gözümüzə ilk görünən ali məktəbin binasının həyətinin zibillli olması idi. Zibil qabları boşaldılmamışdı.
Mühafizəçi olmadığından ali məktəbə sərbəst daxil ola bildik. Yuxarı mərtəbələrə doğru addımlamaq üçün qaranlıq dəhlizlə getməli oldum. Gözümüzə tələblər az dəyirdi. Dərs olmayan auditoriyalara çox idi. Onlardan bir neçəsinə daxil olub müşahidələr apardım. Zibil dolu auditoriyalarda zülmət içindədir, eelektrik sistemi sıradan çıxıb.Dəhlizdə olduğu kimi auditoriyaların da divarlarının boyası qopub tökülüb. Qapılar, partalar yararsız durmdadır. Hətta sınıq şüşəsi olan pəncərələrə rast gəldik. Havaların soyuq keçməsinə baxmayaraq istilik sistemi işləmir. Yararsız partaların bir hissəsi dəhlizdə saxlanılır.
Gördüklərimizdən belə nəticəyə gəldik ki, 2006-2011-ci illər ərzində ATU-nun binasında təmir işləri üçün dövlət büdcəsindən ayrılan 7 milyon manat təyinatı üzrə sərf olunmayıb. Olunsaydı, ali məktəbin korpuslarında təmirli, bərpa olunmuş bir dəhlizə, auditoriyaya rast gəlinərdi.
Tələbələr dedilər ki, 7 milyon vəsait çox güman ki, ali məktəb rəhbərlərinin-rektor, prorektor, dekan, kafedra müdrlərinin otaqlarını təmirinə sərf olunub: “Hər tədris ilində burada fəhlələri görürük, ancaq haranı təmir və bərpa edirlər, xəbərsizik. Bu işlər dəhliz və auditoriyalarda olsaydı, biz görərdik siz də”-, deyə tələbələrdən biri bildirdi.
İnzibati Təsərrüfat işləri üzrə prorektor Abuzər Mirzəliyevin otağına yollandıq. Prorektorun köməkçisinə ali məktəbə gəlişimizin səbəbini anlatdıqda bildirdi ki, A.Mirzəliyev tədbirdədir. Əlaqə saxlamaq üçün (012) 539 12 73 nörməli telefon nömrəsini verdi. Günün sonuna qədər əlaqə saxlasaq da zəngimizə cavab verən olmadı.
//”Bizim Yol” qəzeti
