İyulun 23-də Marsol Group və Moldavian Business Club-un (MBC) birgə təşkilatçılığı ilə "Hill” restoranında ənənəvi "İşgüzar Səhər Yeməyi” çərçivəsində B2B görüş baş tutub.
AZXEBER.COM xəbər verir ki, tədbirin açılışında Marsol Group-un direktoru Bilal Qasımlı şirkətin fəaliyyəti, sahibkarlar arasında qurulan əməkdaşlıq platformaları, biznes əlaqələrinin genişləndirilməsi istiqamətində həyata keçirilən layihələr, eləcə də Azərbaycan və Moldova arasında iqtisadi-ticarət münasibətlərinin inkişaf perspektivləri barədə iştirakçılara ətraflı məlumat verib.
Daha sonra Moldavian Business Club-un CEO-su Pokladova İrena klubun fəaliyyəti, beynəlxalq əməkdaşlıq imkanları və üzvlərinə təqdim etdiyi biznes platformaları haqqında təqdimatla çıxış edib.
Görüş çərçivəsində iştirakçı şirkətlər öz fəaliyyət istiqamətləri, məhsul və xidmətləri barədə təqdimatlar edərək təcrübələrini bölüşüb, yeni tərəfdaşlıqların qurulması, qarşılıqlı investisiya və əməkdaşlıq imkanları ətrafında fikir mübadiləsi aparıblar.
Ənənəvi "İşgüzar Səhər Yeməyi” görüşləri sahibkarların bir araya gələrək yeni işgüzar əlaqələr qurmasına, təcrübə paylaşmasına və uzunmüddətli əməkdaşlıqların formalaşmasına töhfə verməyə davam edir.
